《財神客棧》有齊《証人》、《綫人》雙影帝張家輝和謝霆鋒擔大旗，本已不乏捧場客，但計不到的是同場加映鋒芝婚變連續劇，引人入勝，簡直好睇過戲。唔夠喉？戲中還有令林峯聞風色變的潘霜霜，抵死是就地取材角色名就叫「摧峯九尾狐」，論宣傳可謂賺到盡。雖然九尾狐臨時甩底，但王晶卻認為她來港未必能幫助宣傳電影，皆因霜峯未算紅。 撰文：何永寧
上映日期：6月23日
王晶導演的《財神客棧》自言着眼處不單止喜劇，還加入古龍式的懸疑，希望兩者兼收並蓄。但電影還未上映，先遇上「甩底九尾狐」，飾演「摧峯九尾狐」的潘霜霜臨時甩底，一早跟傳媒安排的宣傳活動全部取消，雖然以霜峯緋聞作宣傳的算盤打不響，但王晶依然好整以暇，他早前接受訪問時說：「我冇乜所謂，觀眾唔會因為新聞嚟睇你部戲，電影收唔收得係睇同期你有乜對手多啲。」
讚霜霜文靜
自言從來不喜歡借新聞去宣傳的王晶補充說：「觀眾因為咁嚟睇咗部戲，發覺唔好睇咪鬧得仲犀利。所以佢身體唔舒服唔嚟得反而係好事，其實你都預咗佢唔會放開懷抱去講林峯啦，講到欲言又止何必呢。當然佢處理得好可以加分，傳媒對佢印象會改觀，但我覺佢仲未有咁嘅能力可以應付。」王晶道出當中利害更不留情說：「潘霜霜有幾紅吖，咪靠單新聞，莫講佢，就算林峯都唔紅啦！」在他眼中只有古天樂、劉德華和謝霆鋒等才稱得上紅，對紅的詮釋王晶謂在於錢，他說：「值錢咪紅囉，梗係用錢嚟投票，唔通幾個妹妹仔攞住個蛋糕喺門口等你就係紅呀，就算陳豪我認為都紅過林峯。」
雖然鬧得盡但對於潘霜霜的印象，王晶表示並不壞，他說：「霜霜戲份唔算好多，不過由頭到尾都會有佢出場。佢係model出身當然每個鏡頭都識將自己最好表現出嚟，而且拍我啲戲壓力不嬲都唔大，大家都會好舒服。其實佢畀我嘅感覺好文靜，當霆鋒同家輝喺片場嬉戲時，佢反而會坐埋一邊睇書或者玩吓電話，個人好文靜唔似一般啲女仔咇哩吧啦好多嘢講。」
家輝扮哨牙
對於潘霜霜的評價，王晶說：「我覺得食NG係導演問題，係你冇講清楚畀演員聽要乜，喺度試同撞梗係成日NG啦。所以我唔會用NG多少嚟衡量一個演員，但潘霜霜係合格，往後仲可以有發揮，其實佢出場嗰吓由村姑變殺手都好有氣勢，係刻意安排，佢亦演得好好。」
王晶不否認《財》片有天時地利之助，原先電影安排去年7月開拍，但霆鋒當時要兼顧《新少林寺》及《綫人》，《財》片惟有推遲開拍，豈料一拖片中的影帝由一位變成兩位，其間還加插張栢芝及霆鋒的家變連續劇，增加電影的注目度，王晶笑說：「哈哈當我賺咗囉，咁我又唔會賺到盡嘅。其實演員拍我戲都好開心，至少冇壓力，所以我同霆鋒講，拍完兩套咁辛苦嘅戲嚟幫我拍輕鬆吓。」王晶覺得令演員放鬆會有意想不到的效果，就像張家輝的造型是自己精心構思，王晶補充說：「嗰棚假哨牙係佢去戲院睇觀眾反應時戴嘅道具，佢話無論如何都要今次用。」
劇情簡介：神捕鬥群魔
《財神客棧》講述謝霆鋒和張家輝扮演白馬城的捕快，城內富翁何百萬全家被殺，家傳之寶「白玉觀音」被盜走，神捕何家勁率領金衣捕快前來查。
剛巧謝霆鋒逮捕了專門騙取賞金的姊妹蔡卓妍和火龍女黃奕，得知白玉觀音將會被送往財神客棧交易。他們遂聯同神捕到財神客棧一起緝兇。客棧內龍蛇雲集，人群中就混有盜寶的摧峯九尾狐潘霜霜及以鷹爪聞名的大盜。謝霆鋒和張家輝抽絲剝繭調查案件，兩人越接近真相亦代表他們越接近死亡，身邊危機重重。
