佘詩曼、陳豪同金剛等，噚日喺電視城為無綫新劇《4InLove》試造型，演巨星嘅阿佘劇中追求普通愛情，佢話現實中追求嘅愛情都好簡單。陳豪話唔怕因拍劇同女演員傳緋聞，問佢女友陳茵媺會唔會監場？陳豪只係儍笑。金剛介紹自己角色時話：「我有好多床戲，好多女仔都鍾意同我上床。」
對於鄭嘉穎喺《怒火街頭》嘅露股罅演出錄得30點收視，陳豪話唔會效法，阿佘就話：「恭喜佢，但我冇睇到，我冇咁濃厚興趣睇。」今年無綫節目巡禮提早到六月舉行，阿佘話去唔到，有傳《花花世界花家姐》反應唔好，所以阿佘要拍《4InLove》撼鍾嘉欣搶視后，阿佘話：「冇諗咁多，我好鍾意個劇本，加上套劇都唔知係咪今年出。」
成傾訴對象
嘉穎噚日去商台受訪，主持問佢可唔可以同兩位前緋聞女友阿佘同周麗淇合作？佢話冇問題，仲大讚阿佘：「佢分析力高又聰明，有時遇到問題都搵佢傾。」