【鋒芝變之忽然改口】鋒芝婚變出現曙光，之前一直發功希望鋒芝分開的狄波拉，分分鐘變大輸家，得罪新抱。企在拉姑陣營幫口的謝婷婷昨日出席活動時，抽身表示不知情，更指兄嫂一向快樂，只要他們開心就得。
謝霆鋒和張栢芝分居後，栢芝一度玩大咗，發短訊給霆鋒要求離婚，關係一度冰封。鋒芝婚變期間，老爺奶奶也分成兩大陣營，被指一直不喜歡新抱栢芝的狄波拉，之前被傳幕後指示查小欣爆栢芝暗奪霆鋒資產，希望拆散鋒芝分開，近日隨住霆鋒因兩個仔而心軟，栢芝在片場又笑得出，兩人的婚姻暫有轉機，一心想兒媳分開的拉姑隨時變輸家。
謝婷婷之前指栢芝經常不讓Lucas返學，與拉姑站在同一陣營，婷婷昨日和白歆惠、熊黛林及文詠珊（JaniceMan）等，在尖沙嘴出席EsteeLauder活動，谷胸鬥性感。婷婷被問到鋒芝婚變進度，一度傳離婚等問題，她即收口說：「我唔識睇中文，冇問呢啲，平時都唔會call霆鋒，唔係唔關心，佢有嘢會打嚟，我等佢主動打畀我。」
「霆鋒識得處理」
對於栢芝被指暗奪霆鋒資產，婷婷也表示不清楚，有指栢芝以兩個囝囝做本錢，婷婷說：「霆鋒大個仔，今年特別成熟咗，佢識得處理，搞唔搞得掂都處理到，我見佢哋平時都好開心、好幸福。」
不過婷婷承認有一個月沒見過Lucas，也沒有去過陽明山莊，至於有指Quintus由拉姑照顧，婷婷說：「之前都有湊過兩個月，因為栢芝同霆鋒都要拍戲。」問到婷婷的立場，是想鋒芝和好還是分開？她以英語說：「點都好，只要佢哋開心。」
採訪、攝影：梁錦雯
