嚟緊連續三日假期，天文台話陽光普照，咁好天氣，有乜好得過遊車河？今日有BMW新貴X1Sport登場，一身熊貓黑白配襯，雖然可愛換成霸氣，不過走簡約入門級別，不失豪華之餘車價仲鬼咁吸引，享受陽光話咁易！
記者：徐影龍
攝影：陳盛臣
Model：Rika@GME
黑白配襯別具味道
啱啱去完海洋公園探安安同佳佳，對呢對可愛活寶貝印象深刻，再望番BMW全新X1Sport，白色車身輔以黑色點綴，不期然好感叢生；當然，X1造型動感，單單鷹眼般嘅頭燈，再加下方網狀氣壩位，已極具霸氣，唔似圓碌碌熊貓咁可愛，不過由頭唇、裙腳到尾泵把均屬黑色，窗框及側鏡邊位都以黑色呈現，望上啲就連頂架都係黑色，黑白比例平衡恰到好處，相比過往朱古力色，有着另一番味道。
Sport版嘅最大特色係玩簡約，車價三十幾萬，齋計寶馬牌頭同外形已經值回票價。雖然大家見慣見熟嘅iDrive多功能旋鈕及電動天窗不見了，但前排兩張電控座椅、多功能軚環及防刺眼倒後鏡等仍然健在，最正係保留皮櫳設計，由門內側到全車座椅，均用上真皮物料，摸落零舍軟熟舒服，不過有消息話嚟緊X1Sport會換番人造皮，想感受呢股「皮氣」，真係要快手。
輕輕鬆鬆揸返工
既屬入門級，性能規格亦跟之前有所不同。呢款型號為xDrive18iA，引擎由3,000cc直六，變成2,000cc直四，馬力為150匹。試車時不抱太大期望，純以遊車河心態，驅車往清水灣拍攝。平心而論，18iA無大佬25iA可以玩得咁放咁癲，不過啪落D波，又真係輕鬆應付到所有大斜路同急彎，就算坐滿人穿梭相思灣嘅狹窄村路同極斜山坡，一樣順住行毫無窒礙感，正面啲睇，既然夠行夠用，細cc變相幫你慳番唔少油錢，加上車身高易睇位，嬌滴滴女仔都好啱揸。
操控其實亦大不同，尤其轉入+/-模式後，拖波Keep轉數入彎，夠力出彎之餘，感覺上比之前更靈活，原因係由四驅變成尾驅，快入快出時靈活感尤其明顯，跟四驅揸法的確有點分別，對喜愛FR車嘅人嚟講，應該更為得心應手。
BMWX1xDrive18iASport
引擎：1,995cc直四
馬力：150PS/6,400rpm
扭力：200Nm/3,600rpm
傳動：六速+/-波箱尾驅
售價：$359,800起
查詢：27145271（BMWHK）