香港中資證券業協會四周年紀念，噚晚喺金鐘港麗酒店搞咗個酒會。港交所（388）行政總裁李小加（圖）以嘉賓身份致辭，正所謂禮多人不怪，佢連續講咗5次「多謝」，至於多謝啲乜華華就唔記得咯，不過，最啱聽係佢提到，希望香港證券界有機會得到入大陸市場嘅入場券。
華華喺場內仲見到唔少中資、台資同港資證券行大佬，包括已退下火線嘅大福證券（即現海通證券）前董事總經理黃紹開。開叔啱啱由美國紐約旅行返嚟，已經計劃再出埠，除咗希望有機會再訪南美洲，故地重遊，仲希望多啲返大陸。開叔話，佢過往職務纏身，就算去到某啲國內大城市，都行唔開，莫講話去景點睇吓，家雖然喺海通掛住個顧問銜頭，但比以前輕鬆，所以想去邊就去邊。