前日無綫喺九龍灣舉行《2011年香港先生選舉》首輪面試，擁有39吋胸嘅蕭家浩，因為貌似蕭正楠而被稱為「蕭正北」。佢參加完面試後，去咗附近商場一間餐廳同一名身形略肥嘅女子會面；但期間佢發現記者蹤影，所以未食完就撇低女伴離開。
見親都係女人
蕭正北為咗擺脫記者仲行咗上淘大花園嘅停車場，又碰到幾個相識嘅少女同佢打招呼；佢見擺脫唔到記者索性走咗入電器舖，見佢集中研究洗衣機同冷氣，睇嚟佢幾住家男人，最後避無可避下，佢喺附近同一老一嫩嘅女性會合，相信都係佢嘅家人。
跟住一行3人到商場嘅超市買嘢，佢哋買咗兩大袋戰利品後離開，不過一出門口蕭正北就同家人分道揚鑣欲撇甩記者；最後雖然失去佢嘅蹤影，但之前同佢一齊嘅老人家就入咗彩霞村一幢樓，相信蕭正北都係呢度嘅住客。