雖然任天堂3DS已出咗一段時間，但有唔少人仲等緊大作推出才出機，其中Capcom隻《Biohazard:TheMercenaries3D》就係好多機迷期待之作。大玩3D射擊，睇住喪屍被爆頭爆血，玩到經常左閃右避，投入度滿分！
記者、部份攝影：許福合
3D開戰有景深
3DS使用裸視3D，效果偏向多層次嘅立體感，所以好適合《Biohazard》這類以主觀視點為主的遊戲。例如當有喪屍接近時，就會發現至少有三層畫面：主角本身、喪屍及場景，形成具空間感嘅立體及景深效果，比好多橫向遊戲效果都好。試玩時將3D效果開到最盡，但發覺強弱分別不大，有時玩得投入，遇到爆血爆頭場面，人會不自覺左閃右避。但要留意稍側嘅角度時，畫面明顯較暗，會看不清楚瞄準，按住R轉去射擊視點時切記不要打側睇。
強化八大角色
與近期《Biohazard》衝鋒陷陣式打法相似，玩法好直接，一開場就埋牙肉搏，喪屍不斷埋嚟同你「親熱」！而遊戲會使用Mission形式，每個Mission會定下關卡條件，例如初期遇到其中一個難關，就要一分鐘內清場，應該難倒不少人。事關開場前，可選擇使用角色，而每個角色武器亦會有分別，例如Chris火力較重，Jill有專門爆破技，而新登場Claire武器亦相當強。暫時所見，隨住遊戲進度，合共至少有八名角色。
除了留意上芒3D效果，殺敵時仲要留意下芒，會顯示地圖及武器，點選就會換槍，玩落都幾方便。另外仲有強化系統，可從30種技能中選擇強化角色。
美版月尾殺到
除咗單打作戰外，你仲可透過Wi-Fi連線進行雙人合作，兩人聯手殺喪屍之外，仲有輔助模式，在一方垂死之時，拍檔可以幫忙回復生命。仲要一提係附有《Revelations》試玩版，有傳統《Biohazard》解謎氣氛及3D效果，Fans們好值得試吓！
另外，暫時落場都係日版，所以文字方面當然以日文為主；若然你係用美版機，又想睇英文了解古仔，咁就要等多陣！美版月尾就會殺到，內容完全一樣，會轉用英文顯示，最重要係價錢仲要平啲，日版約$338，而美版只要$288。
Profile
主機：3DS
類型：射擊
遊戲人數：1-2人
廠商：CAPCOM
官方網站： http://www.capcom.co.jp/bhm3ds/
