電訊盈科（008）同香港寬頻呢場「公屋居屋風雲」，究竟鹿死誰手？華華當然唔知，唯一可以講嘅係，電盈比較「筍」……華華講嘅係佢哋個廣告！
皆因新一輯200M光纖入屋廣告，小小超搵嚟入晒屋嘅「筍盤」、「師奶殺手」陳豪粉墨登場，仲着埋電盈嘅安裝師傅制服做代言人，對於一眾港女嚟講，直情係「制服誘惑」。
至於一向計仔多多嘅電訊魔童王維基，竟然好平靜咁還手，真係令華華有啲意外。
電盈嗰邊話，搵阿Mo主要係佢形象正氣健康，入晒屋呢點更加係唔使講。至於要幾多錢先請得郁阿Mo，有關方面唔肯講，只係話總之「開心價」。
不過，江湖傳聞吸金力極高嘅阿Mo，廣告身價係咁易都「一球」，畀着係華華都開心囉！