今年雖則係單數年，不過喺暑假仍然有大把大賽，好似係美洲金盃、U21歐國盃、女子世盃同埋美洲國家盃，所以對某啲球星好似係西甲馬德里體育會孖寶迪基亞同埋科蘭嚟講，個暑假就要分段式咁放，趁個賽事未開波之前同另一半鬆一鬆，實行提早放暑假、投奔初夏。
科蘭明星look晒腹肌
盛傳會喺今夏由馬體會過檔英超曼聯嘅西班牙新晉門神迪基亞，就入選咗小狂牛參加今個月11號喺丹麥舉行嘅U21歐國盃決賽周，由於西甲已喺上月22號煞科，所以佢就趁呢個空檔同自己個歌星女朋友仔艾杜妮去玩；不過因為唔可以放好多日，於是近近哋去咗法國巴黎嘅迪士尼樂園就算。而我求大俠見佢同頭戴米妮頭飾嘅女友喺樂園邊行邊講電話，唔知係咪小狂牛教練路爾斯米拿打嚟check佢，費事佢快樂不知時日過，唔記得返國家隊報到？
至於迪基亞嘅馬體會隊友科蘭，禮拜日先至代表完烏拉圭喺友賽作客德國（輸1:2），但轉個頭經已飛咗去美國邁阿密，同未婚妻娜拉短聚幾日。烏拉圭喺7月頭會去阿根廷踢美洲國家盃，家陣差唔多要開始備戰，下周中就約咗荷蘭打番場熱身賽，科蘭亦有入選。喺入伍前，佢就立即去邁阿密感受一下陽光與海灘，順便睇埋NBA總決賽嘅第一場比賽。戴住黑超兼上身冇着衫露咗6嚿腹肌嘅科蘭，驟眼睇成個明星咁，仲同佢嘅阿根廷籍索模娜拉鬼死咁襯㖭。查實英格蘭名宿連尼加同老婆丹妮爾都喺邁阿密度假，咪睇佢成50歲人，身材仲好「弗」，嗰6嚿腹肌唔差得過科蘭。
侯度史東撐「大帝」
另外，熱刺班球員好似係侯度史東同埋艾朗連儂咁，都去咗美國邁阿密玩，其中侯度史東好識做，知道熱火入咗NBA決賽之後，即刻着熱火件波衫博上鏡，而且仲係勒邦占士件嘅6號衫。話時話，舊年佢俾人惡搞，將個大肚腩key咗上佢個身度，搞到佢鬼咁尷尬，仲無端端食咗隻死貓，我求大俠祝佢今年好運嘞！
