阿仙奴今季又交白卷，一對失意人法比加斯同尹佩斯，就齊齊飛到美國紐約散心度假；兩位先到美職聯球隊紅牛主場捧老大哥亨利場，之後又入場睇美國職棒；但呢一邊廂，領隊雲格就為留住法比仔同拿斯尼兩位主力，搞到放假都冇心情。
英國《太陽報》就報道，法比仔同尹佩斯早幾日去紐約遊樂，最特別係入場睇MLB，法比仔更買咗件紐約大都會（NewYorkMets）波衫，繡埋自己個名上去㖭；法比仔心情咁好，唔通轉會巴塞隆拿就快成事？
雖然歐洲主要聯賽休季，不過緊接今個周末有國際賽，點解兩人又會咁得閒？我求大俠翻查資料，原本西班牙周六就會作客美國，但法比仔未被教練迪保斯基列入大軍名單，今次先到紐約，可以純粹玩樂；而尹佩斯雖然入選咗荷蘭國家隊，接連作客巴西同烏拉圭嘅友賽，或者可能隊長叫到，勉為其難陪佢走一轉紐約。
球員暑假冇波踢，就話可以周圍玩，領隊就有排煩；好似阿仙奴領隊雲格咁，就俾法比仔同拿斯尼搞到頭都大。法比仔一直傳話會重返巴塞，先前傳聞言之鑿鑿咁講，巴塞歐聯決賽翌日就會出價，雲格就有啲火咁講：「我冇隱瞞巴塞上季對法比仔嘅興趣，但今年到此為止，我冇收過巴塞接觸。法比仔係世界最佳中場，我哋圍繞佢組軍，留住佢係我第一心願。」
拿斯尼扭續約企硬唔減
雲格慌死留唔住法比仔，續約拿斯尼又一波三折；23歲嘅拿斯尼，可算係今季阿仙奴最出色球員，得番一季約嘅拿斯尼，就希望球會畀到一張同法比仔看齊、周薪11萬鎊（約138萬港元）嘅5年合約，但雲格暫時最多出到9萬鎊周薪，搞到局面僵持。不過阿仙奴唔係全部都係壞消息，好似傳出西維爾願出850萬鎊收購丹尼遜，呢單「刁」成功，雲格真係瞓着都笑醒。