對由粵語殘片時代開始，開篷小跑車已經被定為花花公子座駕，不過就算是花花公子都有唔同類型，「惡公子」要揀跑車，可能會揀日式辣跑；但「貴公子」的優雅英式跑車至係首選。如果好似呢款MGMidget散發埋古典味，最緊要係形象高貴價唔貴，有心的話，可以加入平民貴公子行列。
記者：趙慧敏
攝影：伍慶泉
Model：Hidy、LaYing@GME
車輛提供：TopsAutoEngineeringCo.
曾是賣車王
MGMidget於1961年生產第一代至1980年停產，總產量超過22萬架，成一代賣車王。因停產期近加上產量高，所以古董車價值偏低水，如在英國入口，約二萬多至九萬元不等，不過質素高的售價可達十多萬元，打工仔要進身MG公子行列唔係難事。
引擎如新車般
這輛開篷小跑車屬英國著名車廠MG之產品，雖然現時認識MG的人唔算多，不過喺英國地位一啲都唔簡單，當年查理斯王子同戴安娜大婚時，都係坐MG向民眾揮手，喺世界各地不乏捧場客。呢位車主都係其中之一，十幾年前就用了二萬多元，喺香港透過二手市場買入這部MGMidget，呢款屬1980年MGMidget係車系中第四代，亦係車款最後一代，計埋超過三十年歷史，難得車主多年來將車不斷翻新維修，打開頭冚，引擎新淨到好似新車一樣，所以就算年份高，跑起嚟一樣精神奕奕。當日相約車主試車，我就提出在沙田山路跑一圈，車主二話不說即時跟上，在傾斜度達二三十度的斜坡，一樣越跑越有力，沒半點喘氣，不得不佩服英式造車技術，還有車主花喺佢身上嘅心機。
車冚猶如大餐枱
不過別以為擁有這質素是後天加工，其實由鮮黃色車身到櫳都是原裝正版，只是一些電鍍飾邊作重新翻新，車廂真皮作重新鋪設等基本改動。MGMidget外形貫徹六七十年代歐洲小跑的修長身形，尤其車冚大餐枱般的Size最為搶眼，雖然由第一至三代轉款又轉偈，不過踏入第四代，要改的東西反而不多，與前數代最不同之處，是由原來的電鍍泵把換上黑色膠泵把，原因只是車廠要符合當時美國的碰撞法規。至於內櫳亦以桃木料為主調，配埋幼身軚環，當年被視為時尚，但今時今日都變成復古味濃，不過無論點，一樣足以引死人。
MGMidget
引擎：1,493cc直四
馬力：90ps/5,000rpm
扭力：91Nm/2,500rpm
傳動：四前速手波
售價：$25,000至$100,000（視質素而定）