華華同過檔恒隆地產（101）嘅危機管理專家關則輝（CF）食飯，講開佢初嚟報到，要喺短時間巡勻恒隆旗下嘅物業，包括香港同外地。CF練慣長跑，當然冇問題，但佢下屬就猛叫佢咪行咁快，否則追到氣咳。講開恒隆喺內地嘅商場，CF雖然未行晒，但就考華華，知唔知點解無論恒隆喺內地任何一個城市，商場英文名都有「66」呢個冧巴？
六六無窮好意頭
華華諗，一般建築物如果個地段冧巴靚，都會用嚟做名，好似中環皇后大道中9號。果然不出所料，CF話，恒隆喺上海嘅「地標」恒隆廣場（Plaza66，圖），座落靜安區南京西路1266號，加上樓高66層，中國人講意頭，正所謂「三三不盡，六六無窮」，所以英文名就加「66」。
恒隆廣場成功突圍，集團就喺唔同城市翻版，咁個好意頭「66」冧巴，當然都要遍地開花啦！