蟄伏一排嘅電盈（008）終於出手，狙擊歡喜寃家香港寬頻！今次小小超李澤楷大戰電訊魔童王維基嘅戰場，係公屋同居屋。
話說，電盈噚日突然出手，推出「網上行」200M真正光纖入屋家用寬頻計劃，由即日起至呢個月30號，新客或者轉台嘅公屋同居屋客戶，簽30個月約就可以用月費165蚊呢個新plan，計埋首6個月免費使用，平均每個月使費都只係132元，仲兼享屋內外Wi-Fi㖭。以前喺屋邨搵街霸上電盈個台，速度100M嘅寬頻最平都要155蚊，家陣快一倍，但收費仲平咗。
網上行200M 每月平均$132
佢哋嘅宿敵香港寬頻亦毫不怠慢，即刻還拖，掟個全新重量級優惠服務計劃，仲講明「再掀寬頻減價戰」。香港寬頻個新計劃係1Gbps光纖寬頻（即係1000M），加家居電話，再加bbTV月費，合共月費158蚊。雖然話要俾佢綁兩年，但百幾銀有1Gbps光纖寬頻+固網電話連9項增值服務，仲睇埋佢哋個寬頻電視32條基本頻道，算唔算割喉減價戰，真係見仁見智。剩番嘅和記電訊，雖然未有行動，但佢哋話自己嘅100M，月費99蚊計劃亦好受市場歡迎。
其實公屋、居屋一向都係兩家電訊商嘅兵家必爭之地，無話咩突唔突襲。家一場減價戰如箭在弦，除咗益街坊，可能係免費電視發牌前，兩位候選佳麗嘅熱身戰。一場腥風血雨搶客戰，睇嚟已經拉開戰幔。
李華華
mailto:[email protected]