杜麗莎（Teresa）被前助手黃維棣（阿Dee）控告欠薪，追討薪金、代通知金同遣散費，噚日喺佐敦嘅勞資審裁處進行提訊，庭上審裁官強調噚日唔係正式審訊，主要係提醒佢哋，要提供所有細節文件，準備日後正式審訊之用，之後就苦口婆心咁同佢哋講，打官司有贏有輸，好難預計到時會接受邊個講法，家可以嘗試和平解決，再考慮排唔排期上庭。
分兩期付款
可能Teresa同阿Dee都覺得審裁官講得有道理，經過商議終於決定和解，阿Dee得到6萬蚊賠償，分兩期收錢，每次3萬，Teresa最終都係要賠錢，但離開法庭時竟然四萬咁口，佢話：「今日係beautifulday，我覺得和平就好，每個人都要求唔同，今次令我學多樣嘢。」問佢同阿Dee再見仲可唔可以做朋友？Teresa坦言：「我唔會嬲人，但我唔可以忘記呢件事囉。」
至於收到錢嘅阿Dee又滿唔滿意個結果呢？佢話：「可以接受，之前係追討13萬，同家都差一段距離，但係再拖對大家都唔好，會有影響。」佢仲話之後會幫曾路得做嘢。
