「邊個話做大俠一定要靚仔o架！」最近尹光日日喺電視講呢句，搞到小記自信心都返晒嚟。不過現實世界就無可能做大俠，想威惟有玩佢做代言人嘅全新網上遊戲《天龍八部2》！
記者：王震遠
攝影：楊錦文
醜星做反派
尹光今次戴晒頭封着晒大俠裝，原來係玩緊cosplay，扮演網上遊戲《天龍八部2》中嘅新增角色慕容復。小記睇開嘅明明係張國強版，咩事忽然變成尹光？原來今次《天2》係想帶出身邊每個陌生人，入到網路世界都有可能成為網路高手！《天龍八部》運作已數年，今次推出升呢版，最大更新就係由傳統九大門派新增至十個，加入大反派慕容復身處嘅慕容世家，名慕容派。慕容世家源自燕王遺脈，大燕滅國後只有慕容世家傳承下來，慕容復為求復國而不擇手段，成為遊戲中反派。睇過小說都知慕容復有招「斗轉星移」，《天2》只要拜下該門派，就有機會學到以力打力嚟殺敵。慕容弟子更可學到獨家嘅磨礪術，呢啲經藥草浸過嘅兵符，可以提升戰鬥力。
原著劇情副本
《天龍八部2》改編自金庸著名小說，遊戲開發商將唔少經典劇情化身原著劇情副本，例如「萬劫谷救段譽」同「蕭峰血戰聚賢莊」等都會稍後喺game中重現。現時率先登場嘅有「四絕莊」，一次過可以打勻書、音、畫、棋四個boss級人馬，親身同小說中主角接觸，玩落特別投入。唔想齋打副本升級咁悶，同玩家PK一樣別有一番風味，今次《天龍八部2》更新咗江湖自由廝殺，PK方法新增至十幾種，例如同盟混戰模式改良到唔再可以打到自己友，好多細緻位都有微調！
360度天象全面睇
遊戲世界中有自己一套嘅時間觀，約現實世界兩小時就可以經歷遊戲中嘅一日，上集可能會無咩感覺，不過來到《天2》，情況就有所不同。以前遊戲視點只能夠喺平面轉動，最多睇到附近地面玩家嘅情況，家《天2》就新增咗廣角天象視野，唔只可以睇埋天空，仲有全新天象系統，日同夜、不同天氣都會有明顯變化。有埋360度全面睇嘅觀點，自然更加投入！
102級代言玩家
年年Gameone都會為新推嘅OnlineGame搵來最人氣o靚模做代言人，今次《天2》就打破慣例，由玩家之中挑選出代言人Aki，夥拍慕容大俠尹光宣傳新game，「當初我玩《天龍》，係因為有一大班朋友同我一齊玩，咁玩落都覺得唔錯，就keep住玩咗三年幾時間。」自言使咗五位數字落《天龍》嘅Aki，遊戲中主角已經有102Lv，浸淫遊戲三年，仲好鍾意喺遊戲中結識朋友，「其實一開始就會和對方喺game入面傾偈，知道對方嘅性格係點啦，同埋啱唔啱傾啦，如果真係幾啱傾嘅都會一大班人約出嚟。」Aki聲稱現時活躍於天山server，想同佢一齊玩嘅玩家識做啦！
