陳奕迅（Eason）嘅外婆程玉嫻上周三喺灣仔律敦治醫院病逝，據知程婆婆一直住喺跑馬地，Eason媽咪偶爾會去照顧佢，但上個禮拜程婆婆覺得身體好唔舒服，於是就㩒平安鐘求救，其間程婆婆暈咗，所以救護員無法入屋，最後要出動消防員撬門，救護員先可以送程婆婆去醫院急救，原來程婆婆中風，佢喺醫院留醫咗幾日，到上周三離世。
程婆婆一向好低調，街坊都唔知佢有個歌神乖孫，一直有報道話Eason好少探外婆，但其實Eason好錫外婆，兩婆孫感情好好，外婆又成日煲湯畀Eason飲。
婆孫感情好
Eason知自己係狗仔隊目標，唔想去探外婆時引埋啲狗仔隊去，所以盡量低調，並唔係外傳佢對外婆不聞不問。Eason最近喺內地做嘢，但佢請到假一定返嚟奔喪，送外婆最後一程。
對於Eason外婆死訊，其實只有親友知道，因為佢哋想低調辦喪事，馮仁昭噚日打畀Eason經理人陳家瑛，佢就話：「Eason嘅私人家事，我哋冇嘢回應，大家有心。」