「華爾街日報」報導瑞士最大銀行瑞銀（UBS）可能分拆投資銀行，而投行會遷冊至倫敦、紐約或新加坡，瑞銀雖然即刻否認有其事，但空穴來風，未必無因，以「華爾街日報」耳目之廣，有此報導，唔會空穴來風嘅啫。
不論消息是真是假，UBS投行如分拆出嚟，以歷史原因計，最可能落腳倫敦或紐約，但點解會有新加坡之考慮呢？香港不在考慮之列噃！
新加坡通街係私人銀行家，係亞洲私人銀行中心，大學有私人銀行（privatebanking）課程，政府刻意要將新加坡建立成為亞洲瑞士。香港有意追趕，證券業學會（TheHongKongSecuritiesInstitute）即將開辦一個CIWM（CertifiedInternationalWealthManager）文憑課程，具備三年金融經驗之僱員可以申請入讀，考試及格可以加多一個銜頭CIWM，方便做私人銀行家，有如分析師考CFA。有課程當然係好事，但要追上新加坡並非容易。
左丁山在新加坡MarinaBay金融區碰到一位香港賓架，佢在國際「私人銀行」工作，被調往新加坡好幾年，左丁山鍾意在金融區行街，領略當地情況，咁啱遇到呢位PB，於是坐低飲杯下午茶，PB話：「如果唔計中國生意，新加坡贏晒香港咯，淨係甲級寫字樓，我地要十層八層，並不困難，在香港就唔駛諗，IFC、ICC、交易廣場已經滿到瀉。講租金，新加坡平一半，講空氣，呢度日日藍天白雲，講娛樂，呢度在MarinaBay北就有一個日夜高爾夫球場，有歌劇院，不日在海旁有個溫室植物公園，仲有，銀行租獨立屋俾我住，租金只係香港三分一。最重要嘅，新加坡國際學校收生，以外國賓架、商人、基金經理等等expats嘅仔女為優先。我個老闆曾在香港工作，就因為仔女入唔到國際學校而不快，堅持要調嚟新加坡。我係香港人，心裏好想香港贏新加坡，但現在睇起嚟，新加坡連賭場都開埋，爭勝決心極大，香港點追呀，如果唔係有中國市場，我地銀行會集中晒喺新加坡㖭！」左丁山聽到冇晒癮，一時唔知點算，最後只能講：「我地勝在多嘢講，政府唔係大晒！」