環球貿易廣場（ICC）建成之後，華華一直只係將焦點放喺嗰度嘅高級食肆。不過，唔講唔知，原來ICC落成，全球好多國家、地區嘅有識之士，絡繹不絕嚟實地考察，成為香港新景點。其中一個「導遊」，就係高緯環球執行總監蕭亮輝（John）。
華華聽John話，家陣好多跨國大企業都走去發展中國家、地區落腳，佢哋首先要搵嘅就係甲級寫字樓。不過，令人頭痕嘅係，呢啲地方幾乎冇乜似樣商廈，當地發展商見甲級商廈有前景，當然重點發展。於是周圍搵參考例子，Jobn話呢班發展商竟然不約而同，都係揀ICC。佢已經帶團睇過ICC無數咁多次，而「帶團」日子仍會繼續。
美公司重保安投行驚冇電
咁跨國企業租office有乜要求？John話，投資銀行、金融機構，最緊張就係數據儲存，所以佢哋好緊張機電設備，一定要有UPS。華華講嘅唔係聯邦快遞，而係UninterruptiblePowerSupply不中斷電源系統，仲要有後備發電機，確保冷氣年中無休。
至於美國公司就對保安要求特別高，譬如佢哋會要求個窗加防爆，同埋獨立郵遞中心。點解美國佬咁多要求？唔使畫公仔畫出腸喇吓嘩！
李華華
mailto:[email protected]