六四22周年前夕，大家除咗要去維園參加燭光集會，八方仲有活動推介，就係去康文署電影資料館睇戲。唔係睇六四紀錄片或民運檔案，呢啲咁反動嘅嘢，相信康文署唔敢播出，不過呢個世界始終有唔少有心人，電影資料館特別喺呢個月安排上映四齣「大哥」鄧光榮嘅經典作，默默向大哥致敬。
年前「黃雀行動」前線總指揮陳達鉦爆出秘聞，披露大哥當年有份參與營救民運人士嘅黃雀行動，由於大哥絕口不提呢件事，因此外界一直唔知道原來大哥係支援民運中堅，電影資料館6月喺「特別早場」放映大哥作品，真係巧合咁簡單？選映四齣經典分別係《學生王子》、《冬戀》、《再戰江湖》及《龍鳳配》，今個星期五起一連四個星期五上映。今年台北電影節「特別放映」單元，亦放映大哥演出或監製嘅作品。