滙控（005）維持強勢，加埋其他藍籌股好似長和系股份紛紛回勇，港股大升499點，收23684，成交仲大增至900億，咁強嘅走勢已經好耐冇見。
成交配合升勢，按經驗港股今朝仲可以睇好，雖然港股中期淡勢未完全扭轉，但係好友暫時掌控局勢，短線造淡風險唔細。滙控好快會上試84元，如果破關而上，恒指好大機會升破24000關。
中煤C輪29951：中煤能源（1898）收10.52元，升2.9%。股價喺低位徘徊一段時間，近日技術走勢轉強，噚日挾大成交突破50日線，下個目標上試11元阻力，破埋會上試位處11.56元嘅250日線，可以諗吓隻C輪29951。
隻輪現價14.9仙，2012年1月9日到期，行使價10.20元，溢價11.1%，引伸波幅40.4%，槓桿率7.1倍（有效4.3倍），正股升上11.56元，29951睇21.8仙，正股跌穿10元就沽咗隻輪。
俊樺