上星期酷熱天氣警報殺到，你今年進行了下水禮未？水性不佳，未學深潛者宜先玩浮潛，原本以為香港水質差，有甚麼好潛呢？但原來香港地不知幾適合Nemo班Friend生長，魚同珊瑚睇得不知幾清楚！近日禁止拖網法例通過，「幾年後，個海底仲靚呀！」
記者：周伽然
攝影：陳陶鈞、譚盈傑、部份相片由潛水歷險會提供
Model：Paris@PureModels
禁拖網 魚漸多
「5月中，立法會通過了禁止拖網捕魚的法案！」原來珊瑚好似餅乾咁脆，被漁船拖網一擊即爛，珊瑚散晒，珊瑚魚無處可居住，其實現在西貢海底已經滿目瘡痍！所以咪浮潛囉，因為近岸漁船埋唔到，所以仲有咁多珊瑚睇。法例通過水底露出曙光，世界自然基金會指出，禁拖網五年後，海底的魷魚和墨魚數量就可以增加三成半，珊瑚魚增加兩成，大魚例如石斑及黃花魚，更可以大升四成至七成，而軟珊瑚和海綿動物亦終於有空間慢慢生長。照咁講，五年後就唔使去水族館，喺真正的大自然潛水都可以見到一大堆HappyFish啦！
同今次帶團出海的潛水教練區紹堅（Steven）講起禁拖網，憶起當年：「潛水前輩成日都講到，香港海底以前好似天堂一樣，講番只係八十年代左右，大龍蝦、大石斑、東星斑喺人面前游，水清到拍得住菲律賓。香港有成八十幾種珊瑚，其實仲多過加勒比海！不過到我九十年代開始潛水時，水已因為起機場而變濁，大魚都好少見了。」唔講唔知，原來捕捉魷魚、九肚魚、瀨尿蝦以至煲湯佳品的牛鰍，都會破壞海床底層，Ohno！最多以後食少啲墨魚丸。落水前Steven提醒我們不要在海裏拿走任何生物或珊瑚，要保護海洋，但原來上一代人還沒有這種觀念：「以前大家環保意識較差，玩潛水一心諗住打魚，學點用魚槍，有時食唔晒都係咁捉，慢慢食得的海產都喺海裏面消失。新一代就要好努力教學生保護海洋。」禁止拖網捕魚，咁對香港整體有乜影響？Steven話發展潛水旅遊業其實更好：「一來可以幫漁民轉型，讓佢哋可以維持生計。至於遊客就最現實，只要香港珊瑚靚又多魚睇，自然就慕名而來，令政府更有動力保護生態。始終旅遊業長做長有，除咗旅行社，遊客嚟到又食又住，對經濟都有幫助。」
香港水域勝在魚多
禁拖網雖然實施，但水底要回復生機仍需時間，不過年輕人家要學浮潛，時間啱晒！ModelParis有豐富外地浮潛經驗，見慣海底靚景，但拍攝時僅在離岸數米的淺水區域浮潛，仍有驚喜：「香港嘅水雖然不及外國清，但竟然相當多魚，頭先成百幾二百條喺我面前一隊隊咁游過，好壯觀！」第一次玩浮潛的阿民雖然唔識游水，不過有助浮衣壯膽，就下定決心「落咗水再算」：「水底真係好靚！嗰個畫面喺電視就睇得多，但真的在眼前出現時，仍會令人覺得難以置信！亦令我對大自然嘅靚而感動，因為在岸上的自然風光無論幾靚，你仍可以一眼睇出人工建設的痕迹，但在水底，一切都是真的，沒有人可以放一群魚在我面前游！」記者問過已有八年浮潛經驗的Michelle，到底有甚麼吸引她一而再下水？「因為每次落水睇到嘅嘢都唔同啊，魚唔會一直停在一個位置，即使在同一個位置下水，一次見到小丑魚，之後一次可能就見到石斑。最難忘的一次是遇上一條成四呎長的油！雖然知道牠會咬人，要小心保持距離，但見到咁大的一條魚在面前游過，感覺真的很興奮！」
惡魚唔好掂
玩浮潛當然想看魚，Steven笑說在香港反應慢點的魚都被捉了，剩下來的都相當醒目，一般都很怕人，如果見到魚就急急游過去，佢地一定走都走唔切。所以咪心急，最緊要慢，魚就較不會躲避，如穿上較沉色的泳裝就更好，螢光比堅尼還是留在岸上影靚相吧。在外地，只要一撒麪包，魚就會從四方八面游過來討食，這一招又行不行呢？「一來外國魚餵慣餵熟，先會一見麪包就游埋嚟，喺香港未必Work。更重要的是，野生魚食過麪包就唔食原本食開的其他生物，其實會影響生態平衡，外國想刺激旅遊業先咁做，我哋明白咗就唔好啦！」所以還是老實地等吧。除了等，還可以主動出擊，例如留意海葵，附近常有小丑魚出沒，另外在石隙和珊瑚之間也有不少魚和無脊椎動物居住。蝴蝶魚和體形較小的石斑也算是常見魚，幸運的話，夏天更隨時可以看見海馬！不過千祈咪手多多，因為有些魚會咬人，有些更有毒刺，「例如魔鬼魚和全身長滿華麗的刺的獅子魚，牠們雖有劇毒，一般卻只在自衞時才刺人。又例如曾有學員見過罕見的藍圈八爪魚，單看牠鮮艷的顏色，就像看到牠在向你發出『我唔講得笑』的警告，而牠的確有劇毒。」其實只要唔好手多多就無事，本來我哋就唔應該騷擾佢哋，係咪？
裝備簡單
浮潛簡單易學，裝備不多，主辦機構一般都預備好助浮衣、蛙鞋、面鏡及呼吸管，穿上做完熱身運動就可以落水。
初學者注意
初學浮潛，最好都係跟有經驗的潛水學校出海，因為有人教你口呼口吸的技巧，用好呼吸管，否則看不成魚卻喝到一肚海水，以後聽到下水也怕怕。熟習以後，其實只要有面鏡、呼吸管和助浮衣這三項基本裝備，已經可以隨時下水，不失為夏日活動的一個平價好選擇。假如自己去浮潛，最方便之選是橋咀洲，在西貢市中心有街渡直達，船程僅20分鐘左右，上午出發，下午已可以盡興而歸。過夜之選則有東平洲，假日有船由馬料水出發至當地，雖然船程較久，但也因此較少遊客，除了浮潛，更可釣魚、捕蟹，和欣賞著名的頁巖，是長周末的首選目的地。
潛水歷險會浮潛班資料：
參加資格：無年齡限制，適合初學者參加
課程內容：一節理論講解及半天海上活動
費用：280元至380元，視乎是否乘船出海（費用已包括全套裝備及導師指導）
查詢：潛水歷險會25722138