端午糉，真係鹹甜萬變不離其宗？以前細路仔鄉下年代，糉只係包住糯米嘅一嚿飯，同便當飯糰差唔多。家？幾矜貴嘅餡料都有得食，富貴鮑魚、魚翅、佛跳牆乜都塞入糯米之中，「糉」之誓要誘惑你。
記者：朱崇德
攝影：楊錦文
Model：Jeana、LaYing@GME
豪吃貴氣
富臨極品鮑魚裹蒸糉
「富臨」阿一哥隻吉品鮑想嗒好耐，鮑魚咬落幾溏心吓，大隻到凸晒出糉面，加埋原粒勁巨瑤柱，果然係富豪級數。糯米呢？食落幾好油水，豬肉、鹹蛋同鴨肉等餡料擺位錯落，啖啖有變化，成隻糉食落好煙韌，正！
創意：★★★★
味道：★★★★★
抵買：★★★★
一品鮑魚糉
五星級酒店「海景嘉福」搭米芝蓮星級中菜廳「海景軒」，鮑魚瑤柱都係最頂級餡料。有幾豪唔多講，反而想講包法，內包糉葉外套荷葉，清新葉香完全滲入。老實，海味味道好難走勻晒成隻糉，就係靠股香氣令成隻糉連成一體，入口有嚼勁。
創意：★★★★
味道：★★★★
抵買：★★★★
金腿魚翅糉
完全玩貴氣！老火上湯煨魚翅，配金華火腿絲，兩者相加，好似老派滬風翅湯咁和味。為配合整體味道，糉身多用綠豆同肥肉，油水極度充足，濕口感真係似碗翅湯咁正，再加栗子、綠豆、蓮子同鹹蛋黃等餡料，咬上了，濕得嚟依然有嚼勁，口感相當不俗。
創意：★★★★★
味道：★★★
抵買：★★★★
鮑魚八寶糉王
$88喫到鮑魚？起初我都有啲誠惶誠恐，一打開，六頭南非鮑巨到無倫，馬上感覺世界好美好！入口幾重鮑味，泰國大乾蝦、原粒瑤柱夠鮮味。唔明？落樓下大牌檔叫個蝦乾炒勝瓜喫吓，你就知啲糯米有幾索味。
創意：★★★
味道：★★★★
抵買：★★★★★
鵝肝瑤柱裹蒸糉
肥肉係膩，但無佢唔成事，用鵝肝代替肥肉確有新意。呢隻糉聰明在只用少少鵝肝提味，多用栗子、綠豆等配料索味。糯米輕輕滲出鵝肝芳香，正！鵝肝落得多了，油份同味道太重，反而失去平衡。
創意：★★★★
味道：★★★★
抵買：★★★
鮮人參黃金鮑魚羊架糉
六頭南非鮮鮑大得過份！舊派做法，用原隻羊架連骨代替肥豬肉，愛羊之人一定難忘陣陣羊肉香。驚味道好膩？所以咪有鮮人參出現囉，參味濃如大補湯水，再加羊肚菌、喇叭菌、瑤柱、有機野米等作平衡，入口完全唔覺膩。
創意：★★★★★
味道：★★★★
抵買：★★★
怪得好味
極品佛跳牆糉
將成鍋佛跳牆放入糉裏面係乜概念？我唔知，淨係知好好味。用薄薄一層糯米包住南非三十頭鮑魚、原隻花膠筒或瑤柱、大海參件、素翅、金華火腿……糯米得咁少，你想啲味唔標晒入糯米都幾難，雖則味重，但餡料唔油膩，食落超清爽，絕讚！
創意：★★★★★
味道：★★★★★
抵買：★★★★★
酒香棗茸滑雞糉
將2010年得獎名菜酒香棗茸雞變成一隻糉！雞肉配紅棗相當補，打開隻糉飄出陣陣糯米酒香，好惹人食慾，其他糉未試過囉！建議玩隔水蒸翻熱，用微波爐或落水烚？會走味囉，盞嘥料。
創意：★★★★
味道：★★★★
抵買：★★★
原隻鮑魚竹筒糉
竹筒飯，將竹樹清香逼入米飯中，呢個竹筒糉原理亦一樣，我喜歡佢口味夠簡單，只用鮑魚提提味，再將竹樹同糉葉嘅清香融入其中。竹筒外殼夠硬，所以做出嚟嘅糉身好彈牙，富貴得嚟又有原始風味，佩服。
創意：★★★★★
味道：★★★★
抵買：★★★★
朱古力鹼水糉
甜糉Crossover西式甜品，好搞鬼！黑朱古力溝牛奶做成有如心太軟嘅甜心，一刀切下，濃濃朱古力漿流心在糉身散出，完全係甜品風味。朱古力漿玩低甜，好甜點者，可以自己加糖。
創意：★★★★★
味道：★★★
抵買：★★★
馬來咖喱牛腩糉
用咖喱牛腩做糉？今次玩嘢嘅係「大班」。馬來咖喱出名在有香蘭葉芳香同椰漿甜味，最正係特多綠豆，味道同咖喱份外夾，只係坑腩稍欠油水，無計，要健康嘛。
創意：★★★★
味道：★★★★
抵買：★★★★
泰式冬蔭風味糉
我鍾意呢隻糉，泰式冬蔭功味道完全滲入糯米，入口有股重重香茅辛辣之氣，不過最抵讚嘅係，中間有一圈厚厚肉鬆，有嘢吓感覺實在得多，或者你可以話佢係泰式粢飯都不為過。
創意：★★★★
味道：★★★★
抵買：★★★
健康之選
紫米八寶糉
紫米溝糯米感覺乾身清爽，重點係放入一隻油水充足嘅蛋，將原本勁Dry嘅一隻糉變得腍身。雖然係健康糉，但極度建議落少量砂糖，壓一壓蛋黃味，感覺更正。
創意：★★★
味道：★★★★★
抵買：★★★★
八寶糉
用中醫概念製糉！主材料為紅/綠豆、蜜棗、花生、葡萄乾、紅/白芸豆及紅糯米，以紅綠黃白黑五色食材，分別對應心肝脾肺腎，達到調和五臟滋補功效，真係幾有諗頭。
創意：★★★★
味道：★★★
抵買：★★★
珍菌上素糉
純素食糉坊間少見，驚寡口？好，就用羊肚菌、冬菇、雞髀菇、竹笙、榆耳同木耳等做餡料，配傳統中式豉油汁。菇類有咬口汁醬夠惹味，好清新健康。
創意：★★★★
味道：★★★★
抵買：★★★
法國牛肝菌蘭度豆糉
素食糉好少落貴價餡料，今次「翠亨邨」用法國牛肝菌及蘭度豆入饌，都算幾重口味，入口完全唔似一般素糉咁清淡無味，想初試素糉又記掛肉香者，可以一試。
創意：★★★
味道：★★★★
抵買：★★★★
五穀十豆健康糉
糉身凸起一粒二粒明顯為加強口感，紫糯米香氣極重，做餡嘅十豆相當軟腍，簡單配搭做出唔同口感，厲害！有時素食比肉食，更能玩出變化。
創意：★★★
味道：★★★★
抵買：★★★
糙米番薯糉
糙米溝糯米做糉，腍得嚟夠煙韌有咬口，最正係日本番薯做心，相對一般甜糉嘅豆沙餡，健康得嚟又唔太甜，番薯軟滑甘香，正到無倫。
創意：★★★★★
味道：★★★★
抵買：★★★
查詢
a.富臨飯店（28698282）
b.蛋撻王（27900990）
c.「海景軒」海景嘉福酒店（27312883）
d.「帝玉庭」帝都酒店（26943939）
e.「粵」黃金海岸酒店（24528668）
f.鴻星海鮮酒家（26280080）
g.大班麵包西餅（23513222）
h.「帝京軒」帝京酒店（26226154）
i.超群（23092608）
j.王家沙（27226222）
k.翠亨邨（23762882）
l.奇華餅家（27856066）
m.東海堂（27391328）
n.美心（21011300）