今日報章有個全版廣告，係一首名為《愛娓娓道來》嘅歌譜。八方噚日搵到登廣告嘅78歲葉太，佢話首歌係撐艾未未，歌名係「艾未未」嘅普通話諧音，歌詞亦句句有寓意，例如「侷處一方，不得伸張」，佢自費喺報紙登廣告，寫明歡迎大家一齊唱，仲話「大國最驚俾人唱衰」。
葉太筆名叫晴情，成日作曲自娛，六四22周年將至，佢有感而發，作咗首「愛娓娓道來」。佢話用刨冬瓜唱先有神髓，歌詞中「演繹純潔的白花，被界定了幽香不得送放！原來有人不愛……」自然係講喺內地被打壓嘅茉莉花革命。
「欺人竊心才不該」呢一句就係暗寸強國成日蝦人、用唔老實手段呃人，「歌詞要好似詩咁，要含蓄，鬧咗人都唔覺」。葉太行動不便，去唔到今年六四燭光集會唱，但希望大家當晚一齊唱呢首歌。