近日向窮人派錢而見報嘅「紫荊俠」噚晚喺facebook澄清：「我不是萬寶寶！」並向對方致歉。
近日有報道揣測紫荊俠其實係名媛萬寶寶（前人大委員長萬里嘅孫女），仲話問過紫荊俠，答案係「唔承認，亦唔否認」。嘩！中共元老後人不滿特區政府施政，化身成俠女幫助貧苦大眾，噱頭十足，即時引起多方討論。八方想致電萬小姐求證，但電話一直冇人聽，但佢嘅微博近日就上載咗喺金三角旅行嘅見聞同照片，相信佢唔喺香港。
另一邊廂，女俠話近日被媒體追訪，不但阻礙咗佢行善嘅進度，仲搞到佢病咗兩日，睇完醫生一直瞓床休息，佢留言話「我雖然是女俠，也是肉身做的，現在的壓力很大」。佢又話日後目標係會叫富豪同名人捐出政府發放嘅6,000蚊，亦希望萬寶寶能帶頭同號召更多名媛捐錢，幫助貧苦大眾。