末代港督肥彭至愛嘅泰昌蛋撻，近日竟然全線神秘縮水。噚日有撻迷向八方報料，怒斥泰昌餅家酥皮蛋撻無啦啦細個咗。唔通因為通脹來了令到餅家將貨就價？八方不敢怠慢，幾經明查暗訪，終於喺一啲分店高層口中探聽到，佢哋工場近排做酥皮確出咗少少問題，個皮焗完後唔知點解縮得好勁，令到個撻細咗。佢哋已經向公司反映，希望及早找出問題根源，做番大個撻咁話。
八方再走去問泰昌公關，公關以極其公關嘅口脗話：泰昌08年開始自設中央餅房生產蛋撻皮及入模，再將半製品送到分店加蛋漿焗製，蛋撻「多年來大小並沒有任何改變」，係承傳創辦人歐陽天閏嘅標準生產，蛋撻圓模一直都冇換過喎。
八方於是豪花$4.5買咗個酥皮撻同大家直擊，發現個撻放入撻盤後，確有唔少虛位，明顯細個咗。