由養鴨養魚到經營超市檔口，再從超市跑去創立點心連鎖店，一位本地農友的曲折人生見證了香港人生活的微妙變化。「超市冇得做o架喇，家陣街市贏番轉頭，而且好多人唔再喺屋企煮飯，個個走晒出街食。」他的點心生意是否成功有待驗證，但港人飲食文化變遷則是不爭事實。
郭誌有今年一口氣在元朗及北區開了4間「志友美食」，主打點心及盅飯。他計劃未來一、兩年內擴充至20間，每間投資100萬元，合共豪擲2,000萬。18元一盅鳳爪排骨飯、15元一碟蜜味叉燒腸，郭誌有稱生意不俗，每間分店每月毛利約3萬元。
街市變靚搶回生意
「我做超市做到意興闌珊！」本身是郭苑漁農場的場主，郭誌有繼承父親家族業務，名下的郭苑養鴨養魚數十年，自己也想不到今天走到這一步。本地漁農界內外受敵，在內，政府甚少扶助農友；在外，即使郭苑把部份農場撤退到內地，仍敵不過廣南行及五豐行。
郭苑也是水產及肉類批發商，90年代，超市集團入侵濕貨市場，向批發商招兵買馬，郭苑在兩大超市集團都設有檔位，一做近廿年。今時不同往日，超市濕貨業務近年江河日下。
有哥說：「超市氣氛冇咗，人流下跌。一方面係因為街市越搞越靚，搶番生意；另方面係家啲人唔鍾意自己煮飯，個個出街食。」他形容，旗下超市檔位生意式微，三年前每個檔位一天生意額可達8萬元，如今跌一半至4萬，「做又得，唔做又得」。
超市集團過橋抽板
超市集團的經營手法屢受詬病，郭誌有亦批評超市過橋抽板：「當初超市為咗吸引濕貨客，零佣金招攬我哋入去開檔。後來人流大增，超市嘅目標唔同咗，家要收我哋兩成佣金，賺我哋嘅錢。其中一個超市集團仲辣，營業額下跌，就加收我哋佣金補貼，好多檔位都做到心灰意冷。」
「以前寄人籬下，家自己話事。」有哥決定另謀出路，利用自己熟悉食品材料貨源的優勢，開設點心店。各分店都是24小時營業，兼顧夜更司機及酒吧客市場。點心盅飯以茶餐廳形式售賣，價錢比酒樓低，食客又毋須等位。他的最終目標是打入市區白領市場：「好多寫字樓上班族鍾意食點心，但冇時間上酒樓等位。」
自從最低工資法例5月生效之後，飲食界呼天搶地，郭誌有卻在此時大展拳腳，他認為部份行家誇張了最低工資的衝擊：「有啲大集團只不過冇以往賺得咁多，唔甘心，係心態問題。」他說，其實人工僅佔點心店大約四分一開支，遠少於租金及食材支出。
記者 蔡元貴