有創意當然係好，不過老人家始終接受唔到太新口味，佢哋心態係──端午節就係端午節，糉就係糉，搞咁多嘢做乜？太過花巧佢哋唔Like。下列介紹嘅「變糉特攻」既保留到傳統，口味配搭又有少少變化，我諗你老爸老媽會接受得到囉。
記者：朱崇德
攝影：楊錦文
傳統變革
桂花豆沙鹼水糉
傳統鹼水豆沙糉真係無乜變化，「大班」呢隻糉鹼水較輕，只有外層一圈，不過最正係將平凡豆沙餡，加入桂花提升香味，估唔到味道幾Match，最重要係豆沙減甜，整體好Light，食得好舒服。
創意：★★★
味道：★★★
抵買：★★★
軟心雙思鹼水糉
賣相同一般紅豆鹼水糉相差無幾，特別處係紅豆心中再加多一層奶黃茸，微波爐一叮，奶黃似流未流！入口有點點葡萄乾，加純自然甜味，整體配搭不俗，既創新又吃得到傳統風味。
創意：★★★★
味道：★★★★
抵買：★★★
金華火腿蛋黃花生糉
將一般包鹹肉糉用嘅肥豬肉，以金華火腿碎粒代替，令肉味香濃！至於肉嘅口感，就係從花生而來，原理同潮州打冷嘅花生一樣，吸咗火腿味嘛，而且相對油份亦無咁高，幾健康。
創意：★★★★
味道：★★★
抵買：★★★
加辣版珠姐XO醬五花腩肉糉
鍾意用辣椒豉油點糉食嘅唔該舉手！「奇華」呢隻XO醬加辣版絕對滿足嗜辣。糯米用XO醬提味加辣，加埋五花腩肉真係超重口感。全隻糉味道合一，唔會話近餡料嗰啖料就特別惹味，真係花過心思。
創意：★★★★
味道：★★★★★
抵買：★★★★
鵝皇肉豆糉
簡單講！佢係舊式鹹肉糉變種！將傳統肥豬肉以鵝肉替代，皮脆味濃嘅鵝肉配合口感特厚嘅肉豆，令全隻糉吸滿鵝肉芳香，油香味比較重，如果配甜味老抽一齊食，感覺會更好。
創意：★★★
味道：★★★★
抵買：★★★
柑桔鹼水糉
果味鹼水糉都諗得出，真係幾有計！普通鹼水糉食得多，感覺好寡口，加入柑桔香味，會起到消滯作用，而且果味清甜，完全係甜品感覺，同以往食鹼水糉鍾意加糖嘅原意不謀而合。
創意：★★★★
味道：★★★★
抵買：★★★
冰凉透心
東海堂冰糉子
好似和菓子咁精美嘅冰糉，面頭係水軟如啫喱、煙韌如橡皮糖嘅「糉皮」，透視住芒果、蘋果同紅豆等餡料，「兩指」Size一啖一隻（每盒六隻），超輕食，完全擺脫傳統糯米糉嘅飽滯感覺。
創意：★★★★
味道：★★★★
抵買：★★★
美心甜心冰糉人氣系列
每盒六隻，三種口味都好有特色，楊枝甘露味道較淡，但有港式風土情懷，個人喜歡富士蘋果同韓國柚子蜜兩種口味，味道勁真，柚子還有一絲絲果皮，好清新宜人。
創意：★★★★
味道：★★★★★
抵買：★★★