大陸嘅數據好多都係靠篤，唔知係咪因為呢個原因，積極拓展三、四線城市嘅沙發商敏華（1999）主席黃敏利，見到一個縣市仔嘅銷售表現突出，佢都唔敢信晒，要去實地考察。
月銷沙發逾30萬
個縣市仔係湖南省婁底，成個縣市得20幾萬人口，但敏華喺當地月銷40至50套沙發，每套賣成六千幾至一萬蚊人仔，即係每月平均銷售額達三、四十萬人仔。
黃敏利同華華講，佢專登由長沙搭咗成兩個幾鐘頭車，去到婁底睇吓究竟發生乜事。原來呢個縣市仔，有成萬幾個公務員，個個消費力特強。咁當地嘅普通百姓呢？黃敏利話，佢都有去過茶餐廳了解，大部份月薪得800蚊左右，絕對唔係佢杯茶。