金管局前總裁任志剛，退休後仍活躍市場，近日亦頻頻亮相論壇講座。時光飛逝，唔經唔覺任總離開金管局都有20個月，究竟國金中心內，仲有無金融沙皇痕迹？
任總曾說，「鐵打的衙門，流水的官」，其實衙門都可以隨水變遷，昔日佢喺88樓嘅辦公室，原來已灰飛煙滅，改建成一間小型會客室。市場中人有時都會去呢間房同該局開會，呢件唔係乜嘢新聞，亦有行家講過，但華華近排成日喺鏡頭前見到任總，觸發思潮。
景物雖變，但相信唔少局內局外人，對任總當年指揮若定，鏡頭前滔滔論述金融形勢嘅畫面，仍存記心中。當然，雷曼苦主亦會記住呢位一代沙皇。
陳德霖寧坐副總裁房
自金管局喬遷國金中心後，總裁同3位副總裁，一直坐鎮88樓，陳德霖05年「中年退修」離開該局，09年衣錦還鄉，十一國慶後接棒做總裁，理論上可用前總裁辦公室，但陳總只係坐咗任總office舊址3個月，待前副總裁蔡耀君（YK）09年底退休，就喬遷至YK辦公室，並展開改建任總office工程。
少咗間辦公室，頂替YK嘅副總裁阮國恆，就用任總前秘書Ivy姐，同任總前私人助理兩間房打通後新建嘅office。
人生在世，好多嘢都係過眼雲煙，老子話，「道大，天大，地大，人大」，人若悟道，即使環境狹窄，內心嘅天空仍然可以好大，世間朝夕變化，成敗得失，就可以淡然處之嘞。
李華華
mailto:[email protected]