利曼跑車亞洲首展

靚車跟藝術結合嘅寶馬ArtCar，已出到第十七代，今次香港仲叻到喺亞洲首展。藝術大師JeffKoons靈光轉動，將利曼跑車M3GT2鋪上明媚彩衣，迷幻中展露速度美感，光影嬌柔組合、機械化作線條。唔明我講乜？That'sanArt！

記者：徐影龍
攝影：林栢鈞
Model：Hazel@GME

藝術大師塗出光影

打從1975年由Alexander打造第一代ArtCarBMW3.0CSL開始，寶馬便不停參與各式各樣藝術活動，至今ArtCar已出現第十七代繼承者，更由國際公認藝術家JeffKoons操刀，授與M3GT2藝術靈魂。Jeff有幾勁？英國皇家美術院頒畀佢沃拉斯頓獎同科普利獎，法國總統Chirac更授其法國榮譽軍團勳章。實際啲講，單單其作品《懸掛的心》五色之一嘅紫色版，喺蘇富比便拍賣出過億港元！
出咗咁多代ArtCar，美感、新奇、騎呢各適其適，但今代M3GT2又真係設計得幾搶眼。靈感來自聖誕燈飾，五彩十色光影灑在車上，令靜態都可活現速度美感。最正係花盡工夫將心血作品貼滿車身，居然讓它參與法國利曼GT2級別賽事，落場激劈！先不論規格達到500匹、0-100km/h僅需3.4秒嘅強悍性能，單單呢身戰紋彩衣，足以拋窒同場對手，更搶盡車迷目光。

■拉花貼紙手工細膩，配襯頭冚優美線條，拼湊出如畫相片。

■頭尾均用上視覺聚焦設計，連巨型餐枱尾翼嘅殺氣亦比下去。

■連睇唔到嘅車底擾流都覆蓋埋，呢啲就係藝術家嘅堅持。

■創作靈感來自聖誕燈飾，我反而覺得全身彩帶更似頭尾燈殘影。

■香港屬ArtCar亞洲巡迴首站，更喺香港國際藝術展進行揭幕。

■國際級藝術大師Jeff，在心血結晶上簽名留念。

■光彩車身上，仍保留碳纖擾流原味，Cult得精采。

本地創意　Brake碟當凳坐

若然錯過剛完結嘅香港國際藝術展，唔使怕，據聞廠方有意推遲下一站新加坡展期，喺寶馬ShowRoom擺多兩個禮拜，免費任人參觀。若然成事，定必第一時間通知大家。
欣賞完國際大師級演繹，本地薑ATB亦毫不輸蝕，同場展出一套由BMW廢棄零件組合而成嘅再生家具（Upcyling）。望住中軸做腳嘅茶几、煞車碟做坐墊嘅凳，估唔到冷冰冰嘅金屬廢件一樣可以充滿生命力。ATB玩過唔少車廠嘅零件再生家具，今次「BMW枱凳」由2男2女共同創作，再夥拍燒焊師傅合力而成。問到舵手Telly，佢話再生家具有別一般「諗完再造」嘅作品，須在眾多零件慢慢組合出理想形態，屬邊做邊諗嘅流程。
嚟緊佢哋再玩大啲，將BMW引擎變做餐枱加梳化嘅作品，好大機會喺寶馬ShowRoom度展出，敬請留意。

■煞車碟咁多散熱口，作為坐墊應該會坐到個PatPat凉浸浸。

■ATB另一款「汽車凳」甚有名設計師風格，好Trendy！

■廢棄零件又重又污糟，但無阻組員嘅創作熱情。