巴塞隆拿噚日凌晨喺歐聯決賽以3:1贏曼聯捧盃，圈中嘅曼聯躉周秀娜、李克勤同任達華梗係要哭波喪啦，周秀娜仲話會安慰佢嘅好友、曼聯球員里奧費迪南㖭。
唔少藝人都有睇波，開波前張堅庭喺微博力撐巴塞：「把我們的身體變作巴塞的血肉長城，巴塞不敗！」佢哋仲一家五口着晒巴塞波衫睇波。
李冰冰現場睇波
喺北京做緊嘢嘅周秀娜就同當地一個電台連線講波，可惜佢嘅愛隊曼聯最終輸波，娜姐噚日喺電話哭波喪：「曼聯雖敗猶榮，我會喺微博發私訊安慰里奧。」娜姐嘅師妹A.Lin同Jeana等，前晚去咗銅鑼灣出席電影《熱浪球愛戰》監製黃永峰生日P，唱K兼睇波。
另外兩位曼聯躉克勤同任達華雖然睇住愛隊輸波，但都讚巴塞球員實力的確較強。李冰冰就代表央視去咗倫敦直擊呢場世紀大戰，賽前仲喺場外同球迷交流，佢話覺得巴塞同曼聯都係冠軍。