最美麗港姐朱玲玲昨日以大師姐身份，為楊婉儀開辦的教育中心開幕撐場。愛好攝影的她剛由非洲拍攝動物回來，提到孻仔霍啟人近日再度蜜運，她反問記者：「好出奇？」更默認見過啟人的新女友，大讚兒子懂事識諗。
朱玲玲昨日現身灣仔，這位最美麗港姐專誠捧楊婉儀場，出席其創業作、教育中心開幕活動，同場還有汪詩詩及胞妹汪圓圓等。
「最緊要佢開心」
自言剛由非洲旅行回來的朱玲玲，大談在非洲的攝影經，她說：「第一次去非洲，都打晒針食晒藥，唔係去大城市，一出去都係睇動物，唔危險，走近都冇欄攔住，好開放，啲獅子都唔會理你，都係去學習，唔係第一次影動物，要影得好靚好難。」
記者告知其孻仔啟人近日再度蜜運，結識了約20歲的長髮美少女，朱玲玲即笑言：「好出奇？」問到她有否見過啟人新女友，她說：「佢啲朋友幾個都見過。」再問她覺得啟人女友如何，她說：「你話呢？佢識揀，唔使我諗，最緊要佢開心就得。」
楊婉儀子女試堂
此外，楊婉儀夫婿王瑞勳、一對可愛子女及老爺王登平夫婦均有前來，她表示親自設計課程，一對子女更做其白老鼠試堂。問到她早前任教於鄧梓峰開設的學校，會否有衝突，她說：「同佢合作好開心，我大個女，都冇衝突，大家都唔同區，不過我教開嘅學生，有啲係過咗嚟上堂。」
採訪：盧妹 攝影：陳俊強