天業節水（840）跌到挨近大股東增持價位，加埋祖國旱情嚴重，天業有得諗。天業股東「天業控股」，呢期向另外兩位股東王孝先及郭書清，總共買入1.12億股天業股份，每股收購價1.20元。而集團經呢期調整，現價跌到落1.35元，同大股東買入成本價差無幾。又「天業控股」嘅終極對口單位，係農八師國資委，來頭甚猛，控股公司經呢期股份增持，對天業前景信心唔使多講。再講，天業主打祖國節水灌溉系統相關業務，而呢期祖國旱情嚴重，長江中下游缺水，天業除咗有短炒Point，相信對本業需求，亦起到刺激作用。呢轉天業再跌，等落到1.20元「長城價」吸納，博上番NAV1.56元水位，潛在回報率30%，PB亦未有耐追得上同業。
億鑽冷敲博升兩成
億鑽珠寶（475）2010年半年度（9月底止）純利，爆升6.9倍到1146萬銀，好省鏡。又下半年以嚟，全球經濟，特別係新興市場發展仍然唔錯，對奢侈品需求有增無減，照計億鑽下半年度業績，一樣咁靚仔。係咁易計數，億鑽2010年度純利2850萬銀，PE由家陣96倍大降到得番10倍。呢轉冷敲博升兩成到1.34元，PE都不過12倍。
錢雋