文章見報之日，歐聯冠軍亦順利產生，可惜未能親到溫布萊球場直擊。不要笑，我真的打算飛去睇，戲碼不是次次啱心水，又要遇啱我壽辰當日比賽，連專辦歐聯睇波團電話都問Keyman攞埋，同道瘋狂人亦搵到，點知正在興致勃勃，接到好朋友來電提醒，原來我忘記一早約好了要去澳門來個兩日一夜大吃大喝旅行團，哎！人算不如天算，有約在先，總不能為了一場波得罪好朋友！
早幾日，住在溫哥華的外甥傳來幾張照片，原來兩兄弟去了捧他們的愛隊「加人」西岸決賽的第5場賽事，幸運地，「加人」該晚在落後情況下逼和聖荷西鯊魚再兩度加時，最後取得勝利兼以總場數4:1贏到闊別了17年的西岸冠軍，兼打入冰球最高榮譽史丹利盃決賽，將會與東岸的波士頓棕熊爭冠軍，不枉他們以高價在網上買兩張炒飛。
他們還十分興奮地告訴我，原來揮金如土的弟弟早在第2圈已經跟同學買飛捧場，那場波花了他450加幣（約3,586港元），因為炒飛要200，買件主隊印有球員號碼及名字的球衣連稅又要250，你話係咪好誇張，不過他用的是每星期幫手做家務賺回來的私己錢。所以當「加人」能與「鯊魚」爭西岸冠軍，兩兄弟都興高釆烈嚷着要入場睇，因為17年前他們一家才剛抵達溫哥華，成為本拿比市的新移民，哥哥才6歲多，未知冰球為何物，弟弟根本未出生，所以機緣巧合，想一嘗在主場館睇住愛隊出賽兼贏波的滋味，惟有上網炒兩張僅低過山頂的山腰位置門票，盛惠500加幣。
兄弟倆最開心是策略正確，首先是弟弟已花了450加幣睇咗一場第2圈賽事，山窮水盡惟有睇哥哥頭，這回節儉成家的哥哥竟然首肯：「細佬，我請你睇，當係生日禮物（我28號生日，佢29號），你負責買飛！」妙在弟弟決定買第5場，機緣巧合下他竟能親眼目擊愛隊成為西岸冠軍，也許我應該等待，何時阿仙奴能踢入歐聯決賽，也一定飛去支持，感受外甥們當天的感受！希望不用等17年吧！
文：盧覓雪