近代大部份汽車都有防盜系統，離遠一按遙控車匙上的開門按鈕，嘟一聲門鎖自動解開，鎖車開車好方便。車主日㩒夜㩒，其實對於呢條車匙呢個系統又了解幾多呢？外國網上流傳三個開車門蠱惑招，用頭、用電話、用密碼都話可以幫你開車門，邊個真邊個假，我哋今日逐一測試，信不信由你！
記者：許維雅
攝影：伍慶泉
Model：Joanne
車尾箱攞嘢 最易反鎖
以前的汽車防盜系統，熄車一段時間後會自動鎖車門，反鎖車匙經常發生，但近年較少見，唔少人話新一代汽車唔會自動鎖門，雖然難以逐間車行逐款型號求證，但肯定有一個情況會好易反鎖車匙！就係落車鎖門後，去車尾用車匙開尾箱攞嘢，唔少人放低車匙喺尾箱，攞完就順手㩒個尾箱關門掣，哈！恭喜你反鎖咗車匙喇！
招式1：用腦電波開車？
只要在YouTube打入UnlockACarDoor，外國有唔少古靈精怪的開車門方法，其中有幾個鮮為人知又有趣的開車門秘技，聽落荒謬，人人大叫無可能，但唔試過又點知呢！怪招第一式，就係車匙跟車距離太遠嘟唔到，只要將車匙貼近個頭再㩒就可以！
測試
結果
成功率50%！
模特兒Joanne企喺一定距離，試將車匙擺放腰間、頭側及舉高手三個位置測試，發現用頭開門真係得，唔通腦電波幫到拖？
http://www.youtube.com/watch?v=lI7zO2hY314&feature=related
招式2：電話傳送開門頻率？
周不時聽聞有人唔小心反鎖車匙喺車廂，英國《每日郵報》就曾經教大家打電話返屋企，叫家人用後備匙對住部電話不停按開門掣，自己就將電話對住車門，車匙頻率可透過電話傳送而解鎖開門。好多香港人都未聽過，包括車行職員、車會會長及博士教授，不過YouTube內就有不少外國測試片段，難辨真假。
測試
Joanne打通電話後，電話另一方匿埋喺大廈大堂，用車匙對住電話不停按開門掣。
結果
以上測試雖算成功，但再走入更遠距離的寫字樓測試，就失敗了！可能只係將軍澳工業邨較空曠，而電話有助增強頻率，如用家中後備匙靠電話開門？應該無可能。
http://www.dailymail.co.uk/sciencetech/article-1206518
招式3：奇怪密碼開車？
YouTube有人教大家只要用電話輸入#884411#號碼後發送，頻率就可解鎖開車門，一聽就知可信性低，如果咁易咁就天下大亂，不過即管一試睇睇有乜結果。
結果
失敗!
當然開唔到，電話屏幕出現錯誤要求訊息顯示，可能外國電話網絡唔同香港！
先進Keyless 救大頭蝦
想避免反鎖車匙，現代科技Keyless系統確係救星，只要電腦感應到車匙喺附近，輕輕觸碰門柄或一按門柄按鈕，車門就會開鎖，即使漏低車匙喺車廂都唔怕。不過某些品牌如Porsche的新一代Keyless系統仲厲害，電腦感應到車匙喺車廂範圍，直頭唔畀你鎖車，不過小心有盲點位！
專家破解？
「10年前有個好熟汽車防盜嘅朋友教我將車匙貼近額側，好遠都遙控到，我試過返到屋企先知無鎖車，處於三十幾樓遙控都得，呢個方法用咗好多年！有啲新防盜好似銀行網上系統咁內置多組號碼配搭，每次開門都有唔同號碼對應車內電腦，以往有偷車賊收集車匙發射頻率複製車匙，家都唔得。」
「特定的數據頻率可以通過電話傳送，如DTMF，即係平日打電話去銀行查詢的音頻錄音，不過車匙的發射頻率應該無可能透過電話傳送，係違反根本理論。車匙靠近個頭會發射得較好，我覺得係因為高度影響，高度係好重要的參數，正如搭講電話影響接收，越高層數會接收得越好。」
