隨住3D電視普及，去AV場揀電視同睇電視嘅人都多咗，不過，咁多款式，咁多種類電視，究竟如何選擇才適合自己呢？如果你正在煩惱如何挑選DreamTV，就一定要留意以下買機五大須知！
記者：許福合
攝影：周旭文
Model：Nie@PureModels
場地：華仁影音（27877993）
穩定100Hz
有打算用到電視來打機的話，揀電視時最好選擇100Hz電視，與50Hz比較，100Hz電視畫面流暢度會較高，用眼睇畫面會比較穩定，無咁跳，打機同睇戲都舒服啲。揀機時可以留意字幕或走馬燈式文字出現時，100Hz電視字體明顯會穩定好多，可以用作比較。
薄身慳位
新款電視更加着重外形，例如SamsungD8000使用5mm邊框，遠睇近乎無框一樣，而好多用家選電視時都會留意嘅厚度，亦只係29.7mm，特別適合掛牆，會慳位好多。若打算掛牆亦要留意，掛架不會跟機附送，須要另外購買，買機時就要留意。
薄身機外形美觀，但想要音響好啲，選擇有SoundBar在機底或左右的電視會較靚聲，但通常機身亦會相對較厚，例如SharpAQUOS電視，機身係厚啲，但真係幾靚聲。
3DSmartTV
3D電視價位越來越普及，可能唔少人都心思思，有幾點要留意，首先係環境，若選購主動式技術3D電視，最好能保持較暗環境，戴眼鏡睇時就無咁跳同攰，另外，亦要留意附送眼鏡數量，想一家大細齊齊睇，通常都要額外購買。
除咗3D，仲興玩SmartTV，其中以Samsung及LG功能比較齊全，內置瀏覽器，可以上網睇網頁，睇YouTube比用電腦更方便，甚至可以透過下載Apps，增加更多功能及下載網上資訊。
不要反光
唔少IT產品都鍾情鏡面，令機身更加美觀，不過若然在電視上出現，似乎效果就會相反。巿面部份電視，反光程度相當強，接近鏡面一樣，睇戲時畫面會多咗影子，若窗口位對正電視，真係怕會被陽光射親！筆者覺得巿面以LG電視反光比較小，對畫面影響不算嚴重，選擇電視要留意吓反光的情況。
保持距離
買電視，好自然想越大越好，但香港寸金尺土，受環境所限，原來過大吋數未必有最佳視覺效果。原因好簡單，越大嘅電視，就越須要保留一定距離，變相令到電視吋數受座位與電視距離限制。
至於要距離幾遠才合適呢？一般公認最佳距離，係將電視屏幕垂直高度乘3，例如一個52吋電視，屏幕垂直高大約為65cm，最佳欣賞距離就會係195cm。決定買電視前，記得拎把尺度一度喇。
與電視保持屏幕高度乘3距離，效果會最好。
