新加坡朋友靚女D話：「食鮑翅你會去發記！」左丁山聽過就算，點知真係有食神，團友K博士係大馬主，喺五月廿一日，香港有馬跑，博士K隻馬跑入第二名，有獎金收，但呢樣只算濕碎啫。K博士精研賽馬，越洋下注一隻二十五倍嘅「活力奔騰」，果然跑出，K博士贏到笑之餘，立即請晒全體團友去發記食戰飯，食完先至入新加坡馬場。發記位於商業中心區背後之廈門街，蔡瀾推薦過，甚有名氣。成團人分三圍，齊吃魚翅、鮑魚、烏頭、遼參……有此口福，拜K博士之賜也。
好彩啫，食到咁飽，入到馬場就唔駛食。新加坡馬場之沙地、草地跑道與沙田馬場不遑多讓，但看台只有一半咁大，至於廂房設施，食物質素，不便置評咯。黃昏六時後有自助餐提供，我地一睇，係咁意食少少沙律就算，一位團友細細聲講：「似乎係中大canteen貨色啫喎！」唔，成班馬主話返到香港，唔好批評沙田、跑馬地嘅廂房飲食咯，原來我地身在福中不知福，好彩成班人中午在「發記」已經食到開晒巷，有排消化，新加坡馬場自助餐不吃也罷。
在馬場下注新加坡馬，無乜憑藉，馬主A事先在7-11買咗本馬簿，有貼士提供，頭三場中晒三重彩，於是第四場開始照跟，唉，一跟就唔靈，搭沉船，於是集中注碼買馬佳善（現新加坡練馬師）向香港馬主講過嘅七場一號FlyingWest，點知呢隻馬佳善馬房馬大熱門倒灶，大家輸到眼光光。然後在第九場買「蓮華生輝」嘅位置，以為會有錢收，點知又輸到面青。第十場新航盃，「加州萬里」係大熱門，左度右度，買兩隻香港馬「加州萬里」與「魔法幻影」位置Q，夠保守啦啩，仲講明一旦「加州萬里」勝出，就一齊恭賀馬主梁，繼而狂歡。唉吔，從來靠後上取勝嘅「加州萬里」呢次竟然出閘後在大外檔搶放，馬主N話：「搣飛都得咯！」結果真係大敗，只見告東尼塊面黑晒，馬主梁對佢念念有詞。於是我地實行B計劃，拉大隊去RiverWalk嘅珍寶河鮮食消夜，會長何請客，大家飲到盡歡而散，馬主W係德國裔，飲啤酒當飲水，飲到幾乎啤啤夫。