坐在旅遊車上聽導遊講新加坡美食，團友都有興趣知道馳名海南雞飯邊度有。導遊話烏節路文華酒店o架啡室嘅海南雞飯，早已褪色，今非昔比，大家無謂花時間，目前比較好嘅一間，係Balistier道嘅「文東記」。左丁山於是第二日（星期六）就坐的士去，「文東記」名氣甚大，司機一聽就知喺邊度，好快去到。當時係十二點前，搵位不難，但十二時半後，旅遊巴士陸續開到，遊客全部上二樓，本地人及散客就坐滿地下，一場嚟到，梗係食海南雞飯啦，一試之下，咦，可能名大於實噃，最多值八十分，與廿幾年前之烏節路文華酒店差咗一皮，亦唔夠吉隆坡唐人街內JalanSultan之「南香」咁好，水準與曼谷水門區嗰間差唔多。
到此一遊，吃過便算，行出門口影番張相，點知有人叫：「師兄，乜咁啱？」一望，哎吔，原來係昔年同事，久已不見（起碼十年）之編輯W，佢話已算係半退休，在大專教學生新聞編輯學，算係過吓日辰，佢參加永安旅行團到新加坡，估唔到居然會在文東記門口相遇，反而在香港就無緣碰頭。
當地朋友靚女D知道左丁山到咗新加坡，話「幾次邀請，你都唔肯嚟，呢次竟然為咗賽馬而光臨敝國，究竟係乜賽事呀？」新加坡賽馬不如香港般熱烈，雖有新加坡航空贊助，但宣傳乏力，連新加坡人都唔知有新航國際大賽，所以佢知道香港有百幾人專程到新加坡睇跑馬，覺得匪夷所思。佢在百忙之中，抽出兩個鐘頭與左丁山食餐飯，去咗一個位於住宅區嘅小型酒店，叫做CopthorneKing'sHotel，位於HavelockRoad，遊客未必知道嘅。哦，原來呢間酒店嘅餐廳有正宗及地道嘅檳城自助餐，絕不洋化，俗稱娘惹餐，腸粉薄皮到極，薑醋豬肉入晒味，檳城炸雞夠香口，薑汁蜆湯與白果豬肚湯令人醒神，靚女D話：「嗱，食翅食鮑魚你會去發記，燭光晚餐你會去Jaan，喺香港你一定試勻一流食肆啦，今餐你一定未試過！」咁又係，坐在左右隔籬嘅都係本地師奶及老人家，佢地就係「本地美食明燈」。忽然之間聽到廣東話，望真吓就係大馬主凌釗城與太太、公子，金融界前輩辛漢權及一班朋友，佢地又係嚟新加坡睇新航國際賽嘅，靚女D話：「服晒你地香港人對賽馬咁狂熱！」