懶理天氣係咪反常，只知道夏天殺到，玩車一樣有季節性，如果可以揸住架開篷車兜番轉，曬到㷫烚烚先似過夏天！要有超班享受？揸部兩百萬元Supercar在公路飛馳，颯颯強風穿透皮膚，帶來貼身的官能刺激，人人都話Like！今次找來兩款經典頂級版開篷車，為今個夏天掀序幕！
記者：肖文
攝影：伍慶泉
Model：Keko、Christina@EliteModels
MurcielagoRoadster身份象徵
講跑車點少得林寶堅尼，呢款MurcielagoRoadster都算夠矜貴，喺香港真係十隻手指數得晒，可以坐住佢跑一轉，完全係身份與品味的象徵，它被喻為全球最快的開篷車。全車採用6.2公升V12引擎，最高輸出馬力是580匹，由0-100km/h只需3.8秒，真正要幾辣有幾辣！MurcielagoRoadster開篷版03年喺底特律車展亮相時已引起哄動，因為它在林寶家族中屬極為罕有的開篷版。
這款05年出廠的新車價超過四百萬元，如以同年份計，全港只有兩部。至於這部是車主早前從英國以二百多萬元買回來，屬私人收藏，平日都係喺周末揸番轉，想據為己似乎有啲難度。不過其矜貴之處不止因為品牌，事關全車採用大量名貴物料，包括碳纖，令車重只有1,665kg，因屬軟篷設計，所以高度亦較硬頂版矮了70mm，令車形顯得更扁平。
如果屬追求貪方便的車主，其手動軟篷設計可能更令你困擾，因為軟篷置於頭冚位置，想關篷就要自己落手落腳，首先逐一拆車邊「啪鈕」，又要將篷架拆下，花半個鐘真係閒閒哋！想叫車主關番個篷，佢耍手兼擰頭，講到明：「唔好玩我啦！」
LamborghiniMurcielagoRoadster
引擎：6.2公升V12
馬力：580ps/7,500rpm
扭力：66.3kg-m/5,400rom
傳動：6速手波
售價：超過$2,000,000（05年出廠計）
F430Spider聲震高手
識玩車又夠財力，點會少得一部法拉利，不過擁有拉利開篷版嘅人一定唔多，除咗部硬篷California外，點都唔可以數漏F430Spider。呢部08年出廠的F430Spider雖稱唔上極罕，但F430軟及硬篷版比例大約1:10，不過享開篷樂趣又不失震撼力，它無疑是拉利家族中首選。
F430以F360為基礎，不過動力配置提升至4.3公升V8引擎，最高輸出490匹馬力，比起F360高出90匹。不過唔止性能，聲線都係一大賣點，在聖士提反灣等候，完全感受到「未見其車，先聽其聲」的武林高手級境界，此舉當然歸功於車廠刻意喺排氣技術上作調節。另外軚盤採用F1賽車模式，車手可以喺軚盤切換五種駕駛模式，如濕路或賽車模式。
而呢款開篷就慳水慳力得多，事關要開關電動軟篷，真係㩒個掣就搞掂，好Easy！
嚴選開篷車
講開篷都有軟有硬，咁究竟邊款至好呢？找來Vincent提供一啲有關揀選開篷車的秘訣。
軟硬邊種好？
當初發展開篷車都是由軟篷開始，雖然軟篷關上時隔音較差，會有少少雜音，聽到風聲，但咁至係最經典玩法。至於硬頂，隔音性能較高，不過關篷後與一般硬頂車無乜分別。
軟篷易漏水？
現時軟篷設計十分高水準，採用多層物料防水防噪，若保養得好，使用十幾廿年亦可以，不過軟篷最大的天敵是猛烈太陽，長期暴曬會削弱軟篷功能，所以泊車地點最好選擇室內停車場。
電篷點保養？
電篷的關節位較多，長時間使用容易老化損耗，要保持開關暢順，最好定期檢查或者使用潤滑油。
FerrariF430Spider
引擎：4.3公升V8引擎
馬力：490ps/8,500rpm
扭力47.4kg-m/5,250rpm
傳動：六速F1半自動波
售價：$2,650,000
查詢：60300009（中華汽車）