CanonDV落場教戲　炮製ToyStory

以為做導演好簡單，用手機拍完片掟上YouTube，咁就紅爆全港！當然，內容質素更重要，如果你想提高水準，不如跟最新CanonDV學嘢！講緊係LEGRIAHFM41，佢除咗喪玩8款電影濾鏡，仲加入情節拍攝指引，選取特定主題，DV內即提供分鏡技巧，等你炮製一套更具故事性嘅短片。

記者：陳國輝
攝影：楊錦文

內置8種電影濾鏡

其實Filter功能唔算係新搞作，莫講話DV，連M4/3單反相機亦配置好晒！今次M41提供8款電影風格，例如夢幻、冷色、舊電影或者舊照片，選擇雖然幾多，但欠缺咗DramaticEffect，感覺似乎未夠齊全。值得一讚係，Preview效果唔似得一般相機咁，出現嚴重窒格，無論點樣Pan鏡，畫面依然流暢；另外，感應器亦採用HDCMOSPRO，由於核心面積大咗，令佢比傳統DV機嘅感光度提升多2.5倍。

■揀電影濾鏡時可立即睇到效果。

提供情節拍攝指引

有時硬件幾靚都好，唔識得玩分鏡，故事性就大打折扣。不過，M41特別為初級導演們提供情節拍攝指引，簡單啲講，機內有旅行、派對以及慶典等共5種主題，你只要揀選適合嗰項，DV內便提供一連串分鏡提示，例如拍攝派對嗰陣，佢會提示你用近鏡影食物，又會叫你拍攝賓客嘅表情等，十足一本DV天書；當然，你仲可於播放時加插背景音樂或歌曲，令片段更加豐富。