有讀者以1萬3千多元購買貴婦狗中最珍貴及細小的「茶杯貴婦狗」（TeacupPoodle），回家養至3個月大，發覺其肩高達7吋，比「茶杯」應有的體形為大，疑寵物店賣假狗，投訴後店方反斥其餵飼太多養肥狗，與店方無關。狗隻專家指，寵物店售貴婦狗，多不能提供品種、血統證明，狗主新手不懂辨認，容易受騙；此外亦不建議狗主購買茶杯貴婦狗，因多屬不健康及發育不良狗隻。
楊小姐3月時於旺角勝利道「莎莎寵物店」購買了一隻店員聲稱為「Teacup」的兩個半月大茶杯貴婦狗，「間舖專賣貴婦狗，個職員落足嘴頭話咖啡色品種少，加上係Teacup更罕有，又話所有狗都係自家培植，知道晒啲父母血統、遺傳等等，咁信佢講畀$13,800咁貴都值得嘅。」相隔兩周，愛犬體形日漸長大，楊隨即上網搜尋資料，又詢問其他狗隻培植專家意見，懷疑被騙，「我上網聯絡一啲培植貴婦狗狗場嘅專家，話3個月大有7吋高一定唔係Teacup，係屬於普遍玩具貴婦，價錢亦唔使萬三蚊咁貴。」
店方稱餵飼量大出問題
本報向莎莎寵物店查詢，店方未有正面回應，只表示狗隻需配合一定餵飼量，如客人亂餵狗隻食自助餐必出現問題；記者再追問詳情，店員推說有客接待隨即掛線。
楊小姐指本報查詢之前，已向店方查問究竟，「個老闆話賣狗嗰陣都係憑經驗同狗嘅狀態知道屬唔屬於Teacup，如果個客日日餵10餐糧畀狗食，隻狗就一定變大隻，又話根本無可能保證狗嘅size。而且單據上冇寫明係「Teacup」，只係寫「Poodle」，同消委會講都冇用。」楊強調已跟足店員指引，每日餵兩匙乾糧，「之後問過其他專家，話正常狗BB應該食4匙乾糧，已經餵得比正常少，點會因為食太多變大隻？間舖咁講完全無理。」
她最怕其他養狗新手同因誤買體形較大的玩具貴婦狗，促使寵物被遺棄，「隻狗始終係生命，買咗返屋企就一定會養落去；但有啲狗主真係可能屋企環境狹窄，見隻狗體形太大而棄養，真係好可惜。」
個案編號：0421017
發育不良變成茶杯貴婦
狗主愛買茶杯貴婦狗，多因其樣子「的骰」趣玫，及配合港人家居環境狹窄。香港狗會全犬種國際評判梁仲楷表示，其實貴婦狗並無「Teacup」品種，「美國狗會、香港狗會，以至國際間好多狗會，都好難定Teacup標準。如果係愛狗嘅人，根本唔應該專揀Teacup嚟養，因為佢哋咁細隻，多數因為生病、發育不良或父母體形偏細導致，骨折機會亦較大。養狗又點會想養隻病嘅狗？梗係揀健健康康。」寄語狗主別盲目追求Teacup。
梁又指，楊小姐的貴婦狗應為普通「玩具貴婦狗」，待生長至6個月左右體型便固定，「一般玩具貴婦狗價錢約$5,000至$10,000左右，當然視乎血統、品種等等因素。」
購買前宜充份了解
他建議初哥購狗前應充份了解貴婦狗特質，「例如摸落啲骨好粗好大，就要留意係唔係心目中想買嘅細小體形狗隻，因為長大後可能好大隻。」另外，亦建議有養狗經驗友人同行購買。
社會服務
◆報料熱線：29290000
◆社會服務熱線：29908288
◆蘋果日報慈善基金：29908688
◆電郵：mailto:[email protected]
◆傳真：37112468
◆網上捐款： http://charity.appledaily.com.hk/donate
◆各類表格： http://charity.appledaily.com.hk/forms
匿名投訴恕不處理。一經投訴，本報保留刊登權利。