新加坡之新商業中心區建設宏偉，甲級寫字樓大廈由舊區（華僑銀行大廈）河邊開始，一路延伸到海濱南區填海區，不斷湧現，最新有MarinaBayFinancialCentre，配上幾十層高嘅香港「天璽」式豪宅，睇到大鄉里遊客左丁山眼花繚亂。到邊度睇風景最好？如果冇人請你到大銀行寫字樓居高臨下咁望落嚟，就最好入住金沙酒店，到天台游泳池行一轉，咁就乜都睇得一清二楚。投資銀行家R事先知道左丁山到新加坡，介紹一處靚地點：「嗱，你訂著名餐廳Jaan，吃個晚餐，欣賞夜景，冇得彈o架。」
左丁山於是照辦，呢間西餐廳位於瑞士酒店（Swissotel）七十樓，訂枱時聲言只能遲到十五分鐘，否則自誤，都算巴閉。於是緊張啲，天黑前上到去，一望之下，整個新加坡最新繁華區域一覽無遺，直望出海，極遠處見到一個島，聽講係馬來西亞領土。賓架R冇介紹錯，Jaan確係幾正，只是佢講漏一樣，呢度嘅價錢係AAA級，非常昂貴，去一次就算嘞！
從Jaan望出去，PanPacific近在眼前，但晚上路黑，兼夾難行，都係坐的士返去好過嘞。新加坡搭的士原來幾難吓，司機可以揀客拒載，排隊之時，前面幾位本地女士大概係要返屋企，一講目的地，的士司機就話No，後面有幾位洋人想話乘機搶前上的士，左丁山立即大喝一聲：「唔好打尖！」洋婦窒一窒，面紅紅行開，左丁山對司機講：「PanPacific。」司機即刻講Yes，車程唔駛三分鐘，車費四個幾，但要收附加費三元，於是變成七個幾，近五十元港紙，司機好過執。附加費呢樣嘢，遊客摸不着頭腦，一時收三元，一時收四元，有時要收，有時唔要，都唔知搞邊科，司機搵食容易過香港的士司機好多。新加坡樣樣管到實，何解政府放任司機搵銀？外人不易明白。對遊客嚟講，巴士甚少出現，搭地鐵要行一大輪，出入只好靠的士，的士起錶費貴香港四成有多，加上紙水又高，兌番港元，就覺得好唔抵。