如果你不時坐國泰或港龍短途機，八方希望你知道，坐機返港時瞓緊嗰個枕頭，好大機會有其他陌生人啱啱瞓過，因為航空公司原來唔係吓吓換枕頭套！
國泰官方刊物《國泰天地》4月號有一段短文，有機艙服務員問，傳聞當國泰機喺外地回程返香港時，經濟客位乘客嘅枕頭，係唔會先換咗個套，就直接畀下一班機嘅客人用。國泰係大機構，負責機艙質素嘅經理答得好誠實。佢唔怕話你知，呢個並唔係傳聞，而係事實！
長途機一定換
喺香港出發嘅飛機，飛到外地降落後，跟住就會接另一班乘客，啟程返香港。官方刊物直認，喺呢一程機上，工作人員係會視乎用過嘅枕頭嘅乾淨情況，決定換唔換套。咁即係呢，如果工作人員見唔到污糟嘢，就唔會換枕套囉！國泰發言人補充話，長途機抵達外地後，一定會換晒啲枕頭套；但短途機則會降落香港後先換，一日一次左右。負責檢查同決定唔使換套嘅，唔係空姐們，而係當地上機嘅清潔人員。枕頭已係咁，毛氈都係一樣。
同系嘅港龍情況相同，港龍空勤人員協會主席潘芸妮都話，有時喺外地只有一個鐘時間，根本換唔到，「呢頭落機，嗰頭上機，外地嘅人唔係好似香港咁有效率」。港龍發言人話，公司航線多係短途，乘客要求枕頭不多，一般有足夠新淨枕頭畀乘客。
八方問過成日飛嘅謝偉俊，佢都係坐開經濟客位，「好污糟喎，因為有啲唔係肉眼見到，如微菌、任何人體液體、口水、眼水，都唔該有嘅喎。我都好surprise，以為每一次都要換」。佢話只要一次有意外，可將商譽毀諸一旦，「好似我哋去按摩，冇換毛巾都嚇死人啦」。消委會總幹事劉燕卿就話：「有人瞓過，應覺唔係幾好」。
旅遊業議會主席胡兆英爆料話，其實好多航空公司都係咁安排，但如果明顯好污糟，工作人員會換個套。
新加坡航空話，佢哋嘅枕頭係有膠袋入住，開咗嘅一定會換套。其他航空公司未有回覆。
mailto:[email protected]