在旺角奶路臣街開舖40年的漢榮書局，今天之後便會成為記憶，新書局下月中將在油麻地啟用，老闆石氏一家秉承父訓，繼續為本港莘莘學子努力「執書」，為本港百年樹人事業，貢獻一分。
利潤曾達兩成 現僅一成
記者昨日到訪書局旺角現址，見門外已張貼告示，指書局會在今日起暫停營業，油麻地自置新店會在6月中旬開張。因搬書局一事已忙到「一頭煙」的漢榮書局董事總經理石漢基，昨日百忙中抽空接受訪問時笑說：「都要面對現實o架啦，好似個仔大咗，都要結婚搬走啦。好彩家係擴大而搬，冇咩傷感，如果係搬細咗，或者係唔做，就會有少少失落。」
對經營此行數十年，他指未有失敗，也沒遺憾。不過，就覺得此行已是夕陽行業，以往最風光時，利潤達兩成，現時得一成或更低。除因現時競爭非常激烈，行業以價格為競爭手段，令利潤下降外，學生人數減少，教改令學生修讀學科減少，出版商又少賺錢等，都令賣教科書的書局經營愈益困難。「就算交一半市值租金，都冇辦法做咁制，好彩我哋係自己舖，先至冇乜影響。」
面對如此困景，漢榮在新店開張後也會謀變。石氏指，由於新店面積較現址大約2.5倍，約4000方呎，故除有空間繼續賣教科書外，也可兼營賣其他種類的圖書，以作幫補。他不擔心，搬店行會流失客源。另將來如有適合位置及足夠人手下，也計劃在港島灣仔或北角區多開一家書局。
TorontoSports租舊舖
雖然他此輩是遵循父訓，要經營書局，但對下一代是否要接掌此門生意，則持開放態度。他說：「此行業只要有咗基礎，就實唔會餓死你，加埋又唔使交租，影響就唔大，不過，年輕人唔一定有興趣做呢行，視乎佢哋啦。」
漢榮書局位於通菜街63至65號地下C舖及1至2樓部份舖位，據消息人士透露，已由TorontoSports以80萬元承租。舖位去年底曾以招標形式放租，由於附近舖位由波鞋舖包圍，獲波鞋舖承租屬順理成章。
員工及學生心聲
員工嫻妹：有啲唔捨得
畢業後便在漢榮書局工作，間舖要搬，當然有啲唔捨得，話晒對呢度都有感情嘛。不過，將來新舖新環境，又有新挑戰，樣樣都新，都係開心嘅。
姚同學：對舖有感情
細細個已跟父母嚟買書，家買書買習作都會嚟，因為有感情。旺角舖近火車站及地鐵站，買書方便，書種又齊，銷售員樂於幫忙，所以搬舖後會繼續支持。
葉同學：去其他書局
學校建議嚟買書，個人對書局其實並無特別感覺，不過覺得旺角舖嘅位置較方便，日後搬去油麻地雖未至於唔方便，但有得選擇嘅話，咪揀其他囉。
