富利堡車行老闆黃毅力每個月都坐起碼一次國泰機，仲係坐經濟客位，噚日聽到八方同佢轉達國泰枕頭唔一定換套嘅消息，當堂嚇咗一大跳，「吓，我聽朝仲要坐國泰去馬來西亞開會」。佢話回程嗰陣，百分百唔會攞嚟枕。
黃毅力覺得好大問題，「第一乘客唔知呢件事，都假設個枕頭套係有換；第二如果之前用嘅人有皮膚傳染病，我用咗之後會點？我搭國泰嘅原因，唔係因為佢平，係對佢質素有保證，如果係咁樣，我覺得會因小失大，完全扣晒分」。佢話一係回程取消個枕頭，一係換套，佢唔信用肉眼可篩出污糟枕頭。
新民黨副主席田二少話，佢長途先會搭國泰，一定會擺枕頭墊頸，唔係咁擔心。短途就好少坐國泰，反而係內地機多，「老實講，無論點都對國泰信心好啲嘅」。