關心妍近日多次提及要完成心願，再次踏上紅館舞台開個唱，之後便要生BB。早前她於電台的錄音訪問中透露，有很多朋友向她提供生仔秘方，當中黎瑞恩教她完事後要戙高腳。
關心妍（Jade）早前接受商台錄音訪問，提及自己已與唱片公司約滿一事，她說：「我09年結婚之後簽呢間公司，已經三年啦，家真係要顧及另一半感受，加上我都唔想成35歲先生BB。」
Jade遭老公笑儍
現年31歲的Jade透露早已為生BB作好準備，她除了睇中醫調理身體之餘，也有吃補血食品，她說：「因為我有少少貧血，聽人講唔夠血對BB發展都唔好，同埋身邊好多朋友都畀好多生仔秘方我，當中黎瑞恩叫我完事之後要戙高對腳，我之後走去問老公使唔使試吓，不過我老公話我儍。」
Jade又指老公為她不續約唱片公司而感到高興，因為老公一直想她不要再唱歌，她說：「老公都想我快啲搞掂個演唱會之後生仔，咁就唔使個個月都問『今個月試唔試呀』，成日都窒住窒住。同埋媽咪都成日叫我快啲生，反而老爺奶奶就冇畀壓力我。」Jade為了迎接年底舉行的演唱會，現已開始練氣。
醫生：一試無妨
到底造人完事後戙高腳會否有助生育？記者昨致電方玉輝醫生了解，他認為從物理學角度來說也有道理，不過從生理學角度，這樣做幫助不大，因男性射精後，精子理應夠衝力進入子宮，但若心理上覺得這方法能增加懷孕機會，一試無妨。
採訪：李珮洳、葉雪
