李連杰、張曼玉、趙薇同美國著名歌手PaulaAbdul，噚晚齊集新加坡，擔任當地環球影城開幕嘅嘉賓，加上過百位賓客，場面熱鬧星光熠熠。由於當地天氣悶熱，噚晚氣溫依然好高，唔怪得趙薇着咗條黑色吊帶裙行紅地毯，現場見佢竟少有地谷胸上陣，身形弗爆，完全睇唔出佢已經係一女之母。
至於李連杰就單拖現身紅地毯，佢唔單止喺佈景板上簽名留念，仲接受主持嘅訪問，並以流利英語回答。
着唔慣高踭鞋
趙薇行完紅地毯，馬上到貴賓房即時除去黑色高踭鞋，仲將隻鞋嘅相貼喺微博，跟住就留言話：「好久沒穿高跟鞋，讓我歇歇。」而張曼玉就着咗件桃紅露肩裝現身，神采飛揚，之後佢同其他嘉賓一齊上台，再齊齊打手印主持揭幕儀式，佢同身邊嘅PaulaAbdul仲傾得好投契，可見佢心情靚絕。