正當巴塞隆拿備戰歐聯決賽之際，另一西甲班霸皇家馬德里就靜靜地變天，但就唔係摩連奴教完一季後極速離隊，反而係摩帥喺「銀河艦隊」嘅位置越坐越穩;皆因唔妥佢嘅華丹奴宣佈落台，以後摩帥可以話係會長佩雷斯後，一人獨大！
以後喺皇馬話晒事
佩雷斯周三同管理層人員開完大會後，就向外公佈體育總監華丹奴會離開，仲話要重組球會嘅架構，而呢個消息傳出之後，明眼人都知道，以後嘅球會話事權會全部放係摩連奴身上，皆因華丹奴對摩帥有戒心，基本上唔算係秘密。就好似上季咁，當希古恩受到背傷困擾，而只得賓施馬一位前鋒時，摩帥就曾經開腔，希望喺冬季轉會市場買人；但華丹奴就話隊中已經有賓施馬，所以冇咁嘅需要，喺呢件事上，已經暴露咗兩人不和。
傳施丹接任體育總監
至於華丹奴離隊，似乎早前已經有先兆，因為阿根廷人買人方面一向以具星味球星為主，啱唔啱隊波係其次。不過，喺球季結束前後冇耐，皇馬宣佈簽入多蒙特嘅紐尼沙軒同埋拜仁慕尼黑中場咸美艾天托普，兩個土耳其兵似乎屬於實際型球員，多於屬超級球星；亦正合乎摩帥唔理咩球員，最重要係幫到隊波、增強到球隊實力嘅理念。喺呢兩宗交易上，亦露出摩帥其實已經權力在手。
至於體育總監會唔會懸空？咁又未必，因為已經傳出前法國球王施丹會接手上任，但施丹係摩帥力薦登「艦」嘅人，所以兩人應該唔會有衝突；反而摩帥多咗個左右手幫手，以後行事會更加冇王管同得到支持，同以前華丹奴年代一定唔一樣。
睇嚟，摩帥帶領皇馬挑戰巴塞隆拿嘅西甲霸主地位，同埋衝擊歐聯戰線，來季先至係正式開始。
