崇日媚洋，此想法植根香港人，每事每物都鍾情舶來品：「買電器要入德國貨，飲牛奶梗係日牌好，化妝品法國先最正。」近十年來國貨相繼出事，當大陸自由行都識得湧來掃港貨，不如回歸基本步，重投「香港製造」懷抱！
記者：吳美美
攝影：伍慶泉、譚盈傑
康寧牛奶：沙頭角日製4,000支
植根香港品牌的數量其實不少，但敢大大聲話「香港品牌香港製造」的，即時數量驟減。可能你會話，本地都有好多自家手作，都是香港製呀！嗱，話明手作，即是不能大規模生產，小記想找是可惠及多人，憑藉掛上「香港製造」標誌讓人垂青的產品。打頭陣的是康寧牛奶。牛奶和奶粉，近年真是令人又愛又恨，先有中國毒奶行頭，再有日本奶粉斷市，何況奶是BB必需品，唔飲唔得，「真係大嘅唔食，細嘅都要食！」行逛city'super時發現，香港還有唯一同時持有牛群、自有牧場、自有廠房、自行銷售合法牌照的牛奶生產供應公司──康寧牛奶。搭火車到粉嶺，再轉車至沙頭角，看見牛牛樂園招牌，內裏就是擁有49年歷史的康寧牛奶生產地。場內約有40-50隻黑白乳牛，供給每日4,000支牛奶運送至屋邨、有機店舖等，每日約凌晨三時，20名員工密密揸奶，約十時開始送貨，一條龍式生產，包你飲到嗰啖奶係每日新鮮。
「搬返大陸已唔係康寧」
其實大家都唔知有幾耐無試過喺香港飲新鮮牛奶？打開樽蓋時，奶味已然飄出，好香，大啖一飲，比平時起碼濃稠一倍，直逼日本3.6牛乳！God，甚麼公司、甚麼記的牛奶請彈開吧！真要多得牧場話事人石國強先生，小記才知道「鮮奶」美味如此。與康寧差不多同期出道的香港牛奶品牌，生產工序都已搬離香港，石先生自言未有想過搞大佢，反而希望控制自己能力範圍以內，親自監工，他一句「搬返大陸嘅話已經唔係康寧」，可見希望一直留守香港，起碼香港有漁農自然護理署監管牛隻，兼食物環境衞生署把關，比起飲國內毒奶安心萬倍。
康寧牛奶
成立年份：1962年
查詢：沙頭角公路81號地段（26740282）
售賣點：city'super、 http://www.hnmp.net
MiDes：幼童內衣本地製
香港紡織業式微了幾十年，所以，當小記知道專售嬰幼童品牌的MiDes有部份貨品產自本港，是懷有「拆招牌」的心態來採訪的。但當親身到過葵興廠房，見到約20位製衣工人齊齊密密縫時，心情難免興奮！你會問，得二十人點撐起整個品牌的產量？原來現在只有部份內衣系列是在港生產，每日生產五、六百件如美棉內衣系列，本來品牌還有其他產品是在港生產，但由於缺乏人手，惟有縮窄範圍，主力生產他們認為BB最貼身的內衣系列。廠房內，生產過程以流水式作業，共分12個工序，廠務主管唐姑娘解釋：「坦白講，香港的工人會細心啲，佢哋互相之間會提點，拍拍膊頭同前面講。」至於布料，採用的是來自美國的SUPIMA棉花，矜貴程度有如頭抽，係棉花中最靚嗰浸，只佔全美棉花產量3%！小記摸上手，的確軟軟熟熟，好滑溜！
「珍惜眼前」，講就易！MiDesDirector陸秀娟說，支持本地設計，全因香港人才知道香港人需要，例如我們所謂的「和尚袍」綁帶款，香港獨有，歐美流行出產一件頭。無辦法，講到底，只有自己人先知自己要乜。
MiDes
成立年份：1995年
售賣點：屯門市廣場第一期二樓2191B號舖
查詢：24040474
彩豐行：屯門發迹以平取勝
將檸薑、檸樂、蔗糖味引用至護膚產品上，相信都係香港人先諗得到。彩豐行在網上的女性討論區大熱，甲說這支蔗糖滋潤沐浴露又抵又平，乙說其餘的護膚品都以抵價見稱。登入其網址，寫明「香港製造」，原來現時有八百幾款產品的彩豐行，一直植根屯門，由當初專做美容院產品，發展至現時擁有六間零售門市。彩豐行最引人注意的定當是售價，由最平的十蚊一塊面膜，至一支120ml胎盤素十項精華液$358都是女人至愛。價錢平，會諗：「質素得唔得呢？」小記同家母試過沐浴露與面膜，評價均屬中級以上。咁點解賣咁平？原來放棄用代言人不斷落廣告，本身已慳一大筆，加上一條龍生產，自己控制成本。省回成本，推廣就轉用送Sample等手法，畀你試到服為止。研發方面亦是自己包辦，可按照香港人的膚質面色以至氣候特地配製。發展本地品牌有何艱難？彩豐行市場管理及發展部主管Pakki：「做這行最擔憂的是人才，租金人工乃是次要。」奈何香港社會側重商業金融地產，其餘行業無奈要加倍努力！
彩豐行
成立年份：1995年
售賣點：旺角登打士街栢裕商業中心10樓09-13室（鄰近家樂商場）
查詢：23930335