【本報訊】「黃色潛艇」潛水遲到！西甲勁旅維拉利爾昨大軍壓境，備戰明晚8時在香港大球場上演對傑志的Canon盃慈善賽；但「維記」前巴西國腳施仙奴因護照過期，令全隊要陪他在香港國際機場擾攘近1小時，方能移師紅磡出席賽前記者會。
傑志日前公佈西甲維拉利爾訪港名單，港人熟悉的基奧斯比羅斯及尼爾馬等國腳級人馬雖然榜上無名，但碰巧西班牙足總周三公佈的國家隊最新大軍名單，「黃潛艇」入選的5名國腳卡迪維拿、馬真拿、辛迪卡索拉、般奴蘇利安奴及保查華利路，皆可悉數隨軍訪港為日本「3.11」大地震籌款，可謂星光熠熠。
施仙奴累「潛艇」潛水
「維記」強陣壓境，昨亦吸引數十名本港及西班牙記者，在紅磡一酒店守候球隊出席記者會。不過，「黃潛艇」因守將施仙奴護照過期，擾攘近1小時方能走出機場之後出席記者會；球員甫步入酒店大堂亦吸引為數不少的球迷圍觀，傑志「狂牛」前鋒盧比度見到多年好友、維軍門將迪亞高洛迪古斯，更即時與對方相擁密斟。
維軍教練加列度就大軍遲到表示抱歉，中場馬真拿則為今次出戰慈善賽表示高興︰「知道傑志有西班牙球員在陣可以有好表現，兼協助球隊贏得聯賽冠軍賀80周年會慶，好開心；希望球迷周五也會滿意我們兩軍的表現，享受比賽。」
有前日本國腳中田英壽助拳的傑志，將與客軍維拉利爾分別於今午3時及4時45分在香港大球場進行操練。中田英壽及維軍晚上7時將移師香港港麗酒店出席酒會及慈善晚宴。
《花絮》
維軍教頭笑Chino
盧比度人緣好，就連維軍教頭加列度（圖右）噚日出席記者會，都搵佢個花名Chino（中國人）嚟講笑，話佢係全西班牙唯一一個中國球員。
盧比度抄卡迪維拿牌
「黃色潛艇」雖然係過江龍，但傑志有成班西班牙同胞喺度，噚日記者會，成班狂牛兵friend過打band；曾經喺西甲搵食嘅傑志前鋒盧比度（圖右）完咗記者會，仲同老死卡迪維拿（圖左）等交換電話，唔知會帶班「潛水員」去邊度威呢？
球迷有眼不識辛拿
話就話維拉利爾係西甲「4哥」，但港人除咗巴塞同皇馬兩支班霸嘅球員比較熟悉外，其他真係好多名都噏唔出；但話晒都係西班牙捧08歐國盃功臣嘅辛拿，都竟然有球迷問記者佢係邊位？雖則佢搭長途機帶住眼鏡啫，都唔係認唔到啩？